तेहरान , गएराति अमेरिकी सेनाले इरानका कम्तीमा तीनवटा प्रमुख शहर र त्यहाँका दर्जनौँ सैन्य ठेगानाहरूलाई निशाना बनाउँदै शृङ्खलाबद्ध हवाई आक्रमण गरेको छ। अप्रिल महिनामा दुई देशबीच युद्धविरामको सहमति भएयता इरानी सैन्य संरचनामाथि अमेरिकाले गरेको यो नै सबैभन्दा ठूलो आक्रमण हो।
प्राप्त जानकारी अनुसार इरानको रणनीतिक रूपमा महत्त्वपूर्ण मानिने केस म टापु (Qeshm Island) मुख्य निसानामा परेको छ, जहाँका कम्तीमा ७ वटा स्थानमा बमबारी गरिएको छ। यसैगरी, हर्मोज जलडमरू मध्य (Strait of Hormuz) को रेखदेख गर्ने सिरिक शहरका ६ वटा स्थानमा हमला भएको छ भने बन्दर अब्बास शहरमा दूरसञ्चार टावरहरू सहित १० वटा स्थानमा अमेरिकी सेनाले क्षति पुर्याएको इरानी अधिकारीहरूले पुष्टि गरेका छन्।
‘अमेरिकाले सम्झौता उल्लंघन गर्यो’: इरान
इरानका मुख्य वार्ताकार एवं संसदका सभामुख मोहम्मद बगेर गालिबाफले यस आक्रमणलाई वासिङ्टन र तेहरानबीच भएको समझदारी पत्र (MoU) को “गम्भीर उल्लंघन” को रूपमा टिप्पणी गरेका छन्।
सभामुख गालिबाफका अनुसार अमेरिकाले सम्झौता उल्लंघन गर्दै हर्मोज जलडमरू मध्यमा इरानको व्यवस्थापकीय कार्यमा हस्तक्षेप गरेको, थप आक्रमणको धम्की दिन नछोडेको, इरानको तेल क्षेत्रमाथि पुनः प्रतिबन्धहरू लगाएको र लेबनानमा इजरायलद्वारा भइरहेको सम्झौता उल्लंघनलाई प्रोत्साहन दिएको आरोप लगाए। उनले कडा शब्दमा चेतावनी दिँदै भने– “अब धम्की र जबरजस्ती असुलीको जमाना सकिसक्यो। यस्ता दबाबले अमेरिका कतै पुग्दैन।”
इरानद्वारा पनि जवाफी हमला, ८५ अमेरिकी सैन्य ठेगाना ध्वस्त पारेको दाबी
अमेरिकी आक्रमणको लगत्तै इरानको शक्तिशाली सैन्य सङ्गठन इस्लामिक रिभोलुसनरी गार्ड कर्प्स (IRGC) ले आफ्नो सैन्य जवाफको घोषणा गरेको छ।
IRGC का अनुसार इरानी सेनाले मध्यपूर्व क्षेत्रभरि रहेका कुल ८५ वटा प्रमुख अमेरिकी सैन्य सुविधाहरू र ठेगानाहरूमा शक्तिशाली प्रहार गरेको छ। इरानको निसानामा बहराइनको सलमान बन्दरगाहस्थित ‘अमेरिकी नौसेनाको पाँचौँ फ्लीटको मुख्यालय’ (US Fifth Fleet headquarters) र कुवेतमा रहेको ‘अली अल सालेम वायुसेना शिविर’ (Ali Al Salem airbase) समेत परेका छन्।
यसैगरी, इरानी सेनाले दक्षिणी इरानको आकाशमा उडिरहेको अमेरिकी सेनाको अत्याधुनिक एमक्यू-९ (MQ-9) ड्रोन समेत गोली हानेर खसालेको दाबी गरेको छ।
पछिल्लो यो सैन्य टकरावले मध्यपूर्वमा पुनः युद्धको गम्भीर खतरा बढाएको छ।
