काठमाडौँ । अमेरिकी राष्ट्रपति डोनाल्ड ट्रम्पले इरानले ‘स्ट्रेट अफ हर्मुज’ (Strait of Hormuz) हुँदै आवतजावत गर्ने जहाजहरूमाथि कुनै पनि प्रकारको शुल्क, बीमा लागत वा अतिरिक्त कर नलगाउने स्पष्ट पारेको दाबी गर्नुभएको छ।
आफ्नो सामाजिक सञ्जाल ‘ट्रुथ सोसल’मा बुधबार एक पोस्ट लेख्दै राष्ट्रपति ट्रम्पले इरानबाट प्राप्त आधिकारिक जानकारीअनुसार उक्त महत्त्वपूर्ण जलमार्ग प्रयोग गर्ने जहाजहरूबाट कुनै पनि अतिरिक्त शुल्क असुल नगरिने उल्लेख गर्नुभएको हो।
केही सञ्चारमाध्यमहरूमा इरानले शुल्क उठाउन लागेको भनी प्रकाशित समाचारप्रति असन्तुष्टि जनाउँदै ट्रम्पले ती विवरणहरू वास्तविकताभन्दा फरक रहेको दाबी गर्नुभयो। यद्यपि, उहाँले इरानको यो प्रतिबद्धता गलत सावित भएमा अमेरिका र इरानबीच जारी वार्ता तत्काल भङ्ग हुने चेतावनी समेत दिनुभएको छ।
“यदि यो जानकारी गलत प्रमाणित भयो भने, हामीबीच भइरहेको वार्ता तुरुन्तै समाप्त हुनेछ,” ट्रम्पले चेतावनी दिँदै लेख्नुभएको छ।
अमेरिका र इरानबीच क्षेत्रीय सुरक्षा, तनाव न्यूनीकरण तथा आपसी सम्बन्ध सुधारका विषयमा विभिन्न चरणमा गोप्य एवं खुला संवादहरू जारी रहेका बेला राष्ट्रपति ट्रम्पको यो कडा अभिव्यक्ति सार्वजनिक भएको हो। ‘स्ट्रेट अफ हर्मुज’ विश्वकै प्रमुख तेल ढुवानी मार्ग भएकाले यस क्षेत्रको सुरक्षा र पारगमन शुल्कलाई लिएर अन्तर्राष्ट्रिय बजार र राजनीति सधैँ तरंगित हुने गर्दछ।
