वाशिङ्टन: अमेरिकी राष्ट्रपति डोनाल्ड ट्रम्पले आज राति इरानमाथि गर्ने भनिएको आक्रमण रद्द गरेको बताएका छन्। यसअघि उनले इरानमाथि भीषण बमबारी गर्ने तथा यसको मुख्य तेल निर्यात केन्द्र खार्ग द्वीपमाथि नियन्त्रण जमाउने चेतावनी दिएका थिए।
ट्रम्पका अनुसार अमेरिका र इरानबीचको वार्ता उच्च तहसम्म पुगेको छ र त्यसले आवश्यक स्वीकृति प्राप्त गरिसकेको छ। यही कारणले उनले इरानविरुद्धको आक्रमण तथा बमबारीको आदेश रद्द गरेका हुन्।
ट्रम्पले आफ्नो सामाजिक सञ्जाल ट्रुथ सोशलमा लेखेका छन्, “इरानसँगको वार्ता इरानी नेतृत्वको सबैभन्दा उच्च तहसम्म पुगेको र स्वीकृत भइसकेको अवस्थालाई ध्यानमा राख्दै, संयुक्त राज्य अमेरिकाको राष्ट्रपतिका रूपमा मैले आज साँझ इरानविरुद्ध तय गरिएको आक्रमण र बमबारी रद्द गरेको छु। वार्ताका सबै पक्ष तथा अन्तिम बुँदाहरू—चाहे मूल अवधारणा हुन् वा विस्तृत विवरण—सम्बन्धित सबै पक्षबाट अनुमोदित भइसकेका छन्।”
ट्रम्पले अगाडि लेखेका छन्, “यी पक्षहरूमा संयुक्त राज्य अमेरिका, इजरायल, साउदी अरब, यूएई, कतार, टर्की, पाकिस्तान, बहराइन, कुवेत, जोर्डन, इजिप्ट तथा अन्य देशहरू समावेश छन्। जबसम्म सम्झौता अन्तिम रूपमै पुग्दैन, तबसम्म नौसैनिक नाकाबन्दी पूर्ण रूपमा लागू रहनेछ। सम्झौतामा हस्ताक्षर गर्ने समय र स्थान चाँडै घोषणा गरिनेछ।”
यसअघि ट्रम्पले सामाजिक सञ्जालमार्फत अमेरिका आज राति इरानमाथि “अत्यन्त शक्तिशाली आक्रमण” गर्ने र “चाँडै” इरानको तेल तथा ग्यास उद्योगमाथि पूर्ण नियन्त्रण कायम गर्ने चेतावनी दिएका थिए। युद्ध अन्त्यका लागि भइरहेको कूटनीतिक प्रयासहरू अवरुद्ध देखिएको समयमा उनको यस्तो अभिव्यक्ति आएको थियो।
ट्रम्पले इरानसम्बन्धी आफ्नो योजनाको तुलना जनवरी महिनामा अमेरिकाले भेनेजुएलाका तत्कालीन राष्ट्रपति निकोलस मादुरोलाई पक्राउ गरेपछि त्यहाँको तेल क्षेत्रमा नियन्त्रण कायम गरेको अवस्थासँग गरेका थिए।
खार्ग द्वीपमाथि नियन्त्रण चाहन्थे ट्रम्प
खार्ग द्वीप फारसको खाडीमा, कुवेत र साउदी अरबस्थित अमेरिकी सैन्य अड्डाहरूको ठीक सामुन्ने रहेको महत्वपूर्ण क्षेत्र हो। यसलाई इरानको तेल उद्योगको जीवनरेखा मानिन्छ, किनभने देशको करिब ९० प्रतिशत तेल निर्यात यही द्वीपमार्फत हुने गर्दछ।
फक्स न्युजसँगको एक अन्तर्वार्तामा ट्रम्पले भनेका थिए, “मेरो प्राथमिकता सधैं खार्ग द्वीपमाथि नियन्त्रण कायम गर्ने नै थियो। तर, अमेरिकासँग त्यसका लागि आवश्यक राजनीतिक इच्छाशक्ति वा जोखिम उठाउने साहस छ कि छैन, मलाई थाहा छैन।”
