इस्लामावाद: इरानका विदेशमन्त्री अब्बास अराघची उच्चस्तरीय टोलीको नेतृत्व गर्दै पाकिस्तानको राजधानी इस्लामावाद पुगेका छन्। शुक्रबार ढिलो गरी इस्लामावाद आइपुगेका अराघचीलाई पाकिस्तानका विदेशमन्त्री इशाक डार र सेना प्रमुख जनरल असिम मुनिरले स्वागत गरेका थिए।
अराघचीको यो भ्रमण यस्तो समयमा भएको छ, जब अमेरिकी राष्ट्रपति डोनाल्ड ट्रम्पले आफ्ना विशेष दूत र ज्वाइँ जेरेड कुश्नरलाई पाकिस्तान पठाउने घोषणा गरेका छन्। यसले इरान र अमेरिकाबीच पाकिस्तानको मध्यस्थतामा वार्ता हुन लागेको अनुमान गरिए पनि इरानले त्यसलाई ठाडै अस्वीकार गरेको छ।
इरानी विदेश मन्त्रालयका प्रवक्ता इस्माइल बाघाईले सामाजिक सञ्जाल ‘X’ मार्फत स्पष्ट पारेका छन् कि यो भ्रमणको उद्देश्य क्षेत्रीय शान्ति र अमेरिकाद्वारा लादिएको युद्ध अन्त्यका लागि परामर्श गर्नु मात्र हो। उनले लेखेका छन्, “इस्लामावाद भ्रमणका क्रममा इरान र अमेरिकाबीच कुनै पनि प्रत्यक्ष वा अप्रत्यक्ष बैठकको योजना छैन।”
