तेहरान — इरानका एक वरिष्ठ हवाई प्रतिरक्षा अधिकारीले हालैको अमेरिका-इजरायल युद्धका क्रममा अमेरिका निर्मित ‘एफ-३५’ लडाकु विमानलाई सफलतापूर्वक प्रहार गरेसँगै ‘स्टेल्थ’ (राडारले पक्डन नसक्ने) विमानको अपराजित भ्रम अन्त्य भएको दाबी गरेका छन्।
एक टेलिभिजन अन्तर्वार्तामा ती अधिकारीले इरानी हवाई प्रतिरक्षा टोली वर्षभरि नै चौबीसै घण्टा तैनाथ रहने र शत्रुको निसानालाई निरन्तर ट्र्याक र इन्टरसेप्ट (बीचमै रोक्ने) गरिरहेको बताए। उनले अन्तर्वार्ता चलिरहेकै समयमा पनि हवाई प्रतिरक्षा इकाइहरूले एउटा क्रुज मिसाइललाई सहजै ट्र्याक र प्रहार गरेको उल्लेख गर्दै अपरेशनको तीव्र गतिका कारण कुनै उच्च सतर्कता (हाई-अलर्ट) घोषणा गर्नुपर्ने आवश्यकता नै नपरेको बताए।
आधुनिक हवाई प्रतिरक्षा प्रणालीहरू, विशेष गरी क्रुज मिसाइलहरू विरुद्ध लड्न डिजाइन गरिएका प्रणालीहरू, शत्रुको विमान र साना हवाई साधनहरूलाई सजिलै ध्वस्त पार्न सक्षम रहेको उनले बताए।
घुसपैठ गरिरहेको एफ-३५ सँगको मुठभेडको क्षणलाई स्मरण गर्दै उनले भने, “विमानमा सफल प्रहार भएको र त्यसको प्रभाव देख्दा हवाई प्रतिरक्षा टोलीमा छाएको उत्साह वर्णन गर्न नसकिने खालको थियो।”
ती अधिकारीले अगाडि थपे, “यो अपरेशनले लकहिड मार्टिनद्वारा विकसित गरिएको प्रविधिलाई प्रभावकारी रूपमा पछारिदिएको छ।”
इरानी जनताको व्यापक समर्थनले महत्वपूर्ण भूमिका खेलेको कुरामा जोड दिँदै उनले भने, “जनताको उपस्थिति र समर्थन बिना यस्तो कार्य यति आत्मविश्वासका साथ सम्पन्न हुन सक्दैनथ्यो।”
