इस्लामावाद (एजेन्सी) । पाकिस्तानी मध्यस्थतामा होटल सेरेनामा सम्पन्न अमेरिका र इरानबीचको उच्चस्तरीय वार्ता बिना निष्कर्ष टुङ्गिएको छ। इरानले वार्ता विफल हुनुको सम्पूर्ण दोष अमेरिकाको ‘अव्यावहारिक र हस्तक्षेपकारी’ मागहरूमाथि थोपरेको छ।
इरानी सरकारी सञ्चारमाध्यमहरूले इस्लामावाद वार्तालाई अमेरिकाको एकपक्षीय र तानाशाही प्रवृत्ति प्रदर्शन गर्ने थलोको रूपमा चित्रण गरेका छन्। इरानी टोलीले विभिन्न सिर्जनात्मक प्रस्तावहरू अघि सारे पनि अमेरिकी पक्षले राखेका ‘रेड लाइन’ र असान्दर्भिक अडानका कारण कुनै सम्झौता हुन नसकेको तेहरानको दाबी छ।
अमेरिकाले इरानलाई पूर्ण रूपमा युरेनियम प्रवर्द्धन रोक्न र सञ्चित ९०० पाउन्ड युरेनियम देश बाहिर लैजान दबाब दिएको थियो।
सामरिक महत्वको हर्मुज जलसन्धिको सुरक्षामा अमेरिकाले आफ्ना सर्तहरू लाद्न खोजेको इरानी पक्षको आरोप छ।
इरान सरकारनिकट राजनीतिक विश्लेषक अली गोल्हाकीले सामाजिक सञ्जालमार्फत अमेरिकी टोलीको आलोचना गर्दै भनेका छन्, “अमेरिका वार्ताको मानसिकता लिएर इस्लामावाद आएकै देखिएन। उनीहरू केवल आफ्ना सर्त लाद्न र इजरायलको स्वार्थ रक्षा गर्न केन्द्रित थिए।” गोल्हाकीका अनुसार लेबनानमा भइरहेको इजरायली आक्रमण रोक्ने विषयमा अमेरिकाले कुनै पनि ठोस प्रतिबद्धता जनाउन अस्वीकार गरेको छ, जसले गर्दा इरानी पक्ष थप सशंकित बनेको हो।
वार्ता बिहान ५ बजेसम्म चले पनि दुवै पक्षबीच चर्काचर्की भएको थियो। अमेरिकी टोली इस्लामावादबाट बाहिरिइसकेको छ। फर्कनुअघि अमेरिकी उपराष्ट्रपति जेडी भान्सले आफ्ना सर्तहरूलाई ‘अन्तिम र उत्कृष्ट प्रस्ताव’ भन्दै अबको निर्णय लिने जिम्मा इरानको हातमा रहेको बताएका छन्।
वार्तामा अमेरिकी राष्ट्रपति डोनाल्ड ट्रम्पका विश्वासपात्र ज्यारेड कुश्नर र इरानका तर्फबाट प्रभावशाली नेता मोहम्मद बाघेर गालीबाफको उपस्थिति रहेको थियो, जसले गर्दा यस वार्तालाई निकै अर्थपूर्ण रूपमा हेरिएको थियो। तर, इरानको कठोर प्रतिक्रियाले आगामी दिनमा दुई देशबीचको तनाव थप बढ्न सक्ने संकेत गरेको छ।
