अमेरिकाका पूर्व राष्ट्रपतिडोनाल्ड ट्रम्पले इरानप्रति दिएको धम्कीपूर्ण अभिव्यक्तिपछि अमेरिकी राजनीतिमा तीव्र प्रतिक्रिया देखिएको छ। दर्जनौँ डेमोक्र्याट सांसदहरूले उनलाई महाभियोग लगाएर पदबाट हटाउनुपर्ने माग गरेका छन्।
ट्रम्पले इरानविरुद्ध कठोर सैन्य कदम चाल्न सकिने संकेत दिँदै अत्यन्त कडा अभिव्यक्ति दिएपछि डेमोक्र्याट नेताहरू आक्रोशित बनेका हुन्। उनीहरूले यस्तो अभिव्यक्तिलाई गैरजिम्मेवार र विश्व शान्तिका लागि खतरा भएको बताएका छन्।
सिनेटर एड मार्केले सम्भावित युद्धविरामप्रति सन्तोष व्यक्त गर्दै ट्रम्पले “युद्ध अपराधको धम्की दिनु अस्वीकार्य” भएको बताएका छन्। उनले कांग्रेसलाई युद्ध रोक्न र ट्रम्पलाई पदबाट हटाउन पहल गर्न आग्रह गरेका छन्।
कांग्रेस सदस्य शोन्टेल ब्राउनले ट्रम्पले “कुनै स्पष्ट उद्देश्यबिना विश्वलाई संकटको डिलमा पुर्याएको” आरोप लगाउँदै उनलाई “अस्थिर, अस्वस्थ र नेतृत्वका लागि अयोग्य” भनेकी छन्। उनले २५औँ संशोधन प्रयोग गरेर ट्रम्पलाई हटाउनुपर्ने बताएकी छन्।
त्यस्तै, जुली जोन्सनले ट्रम्पको नेतृत्वलाई “अनियन्त्रित र लापरवाह” भन्दै तत्काल पदबाट हटाउनुपर्ने बताएकी छन्।
कांग्रेस सदस्य इल्हान ओमरले ट्रम्पका अभिव्यक्तिलाई “घृणित र खतरनाक” भन्दै उनलाई महाभियोगमार्फत हटाउनुपर्ने माग गरेकी छन्।
यसैबीच, यासामिन अन्सारीले उपराष्ट्रपति जेडी भान्सलाई तुरुन्त मन्त्रिपरिषद् बैठक बोलाएर २५औँ संशोधन लागू गर्न आग्रह गरेकी छन्।
डेमोक्र्याट नेताहरूको यो कडा प्रतिक्रिया सँगै अमेरिकी राजनीतिमा तनाव झन् बढ्दै गएको छ।
