तेहरान — ईरान ले अमेरिका को युद्धविराम प्रस्ताव अस्वीकार गर्दै स्थायी रूपमा द्वन्द्व अन्त्य गर्ने उद्देश्यसहित १० बुँदे काउन्टर प्रस्ताव अघि सारेको छ। सरकारी समाचार एजेन्सी IRNA का अनुसार, पाकिस्तानमार्फत पठाइएको उक्त प्रस्तावमा केवल अस्थायी युद्धविराम होइन, दीर्घकालीन शान्तिको सुनिश्चितता माग गरिएको छ।
अमेरिकाको १५ बुँदे शान्ति प्रस्तावको जवाफमा आएको ईरानी प्रस्तावमा क्षेत्रीय स्तरमै द्वन्द्व अन्त्य गर्ने लक्ष्य राखिएको छ। यसमा लेबनान र गाजासम्म युद्ध रोक्ने, पुनः द्वन्द्व नदोहरिने ग्यारेन्टी, र अन्तर्राष्ट्रिय प्रतिबन्ध हटाउने माग समेटिएको छ।
प्रस्तावअनुसार होर्मुज जलडमरूमध्य बाट सुरक्षित रूपमा जल यातायात सञ्चालन गर्ने व्यवस्था गरिनेछ। साथै, युद्धका कारण ध्वस्त बनेका संरचनाहरूको पुनर्निर्माणका लागि अन्तर्राष्ट्रिय सहयोग आवश्यक रहेको उल्लेख गरिएको छ।
ईरानले प्रस्तावमा हिज्बुल्लाह विरुद्धका इजरायली आक्रमण अन्त्य गर्नुपर्ने र भविष्यमा ईरानमाथि कुनै पनि किसिमको आक्रमण नहुने स्पष्ट ग्यारेन्टी माग गरेको छ। यसको सट्टामा ईरानले होर्मुज जलडमरूमध्यमा लगाइएको नाकाबन्दी हटाउने जनाएको छ।
यसैगरी, उक्त जलडमरूमध्यबाट गुजरिने प्रत्येक जहाजबाट करिब २० लाख डलर शुल्क उठाइने र त्यसलाई ओमानसँग बाँडफाँड गरिने प्रस्ताव गरिएको छ। उक्त रकमलाई प्रत्यक्ष क्षतिपूर्ति नलिई युद्धग्रस्त क्षेत्रको पुनर्निर्माणमा प्रयोग गरिने बताइएको छ।
यस प्रस्तावबारे प्रतिक्रिया दिँदै डोनाल्ड ट्रंप ले यसलाई “महत्वपूर्ण कदम” भनेका छन्। तर, उनले यो पर्याप्त नभएको उल्लेख गर्दै तोकिएको समयसीमा भित्र शर्तहरू पूरा नभए थप सैन्य कारबाही हुन सक्ने चेतावनी दिएका छन्।
मुख्य बुँदाहरू
ईरानमाथिका सबै आक्रमण रोक्नुपर्ने
अन्तर्राष्ट्रिय प्रतिबन्ध पूर्ण रूपमा हटाउनुपर्ने
भविष्यमा आक्रमण नहुने ग्यारेन्टी
लेबनान र गाजामा युद्ध अन्त्य
पुनर्निर्माणका लागि सहयोग
होर्मुज जलडमरूमध्य खुला गर्ने
जहाजबाट शुल्क उठाएर पुनर्निर्माणमा प्रयोग
