पश्चिम एसियामा बढ्दो तनावका बीच अमेरिकी राष्ट्रपति डोनल्ड ट्रम्पले इरानलाई अहिलेसम्मकै भयावह धम्की दिएका छन्। ह्वाइट हाउसमा सञ्चारकर्मीहरूसँग कुरा गर्दै ट्रम्पले अमेरिकाले चाहेमा मात्र एक रातभित्रै इरानलाई पूर्ण रूपमा ध्वस्त पार्न सक्ने दाबी गरेका हुन्।
उनले भने, “हामीसँग यस्तो सैन्य शक्ति छ कि इरानलाई एकै रातमा नामेट पार्न सक्छौँ, र त्यो रात भोलि नै पनि हुन सक्छ।” ट्रम्पको यो अभिव्यक्तिले विश्व राजनीतिमा नयाँ हलचल पैदा गरेको छ।
४५ दिने युद्ध विराम प्रस्ताव ईरानले अस्वीकार गरेपछि ट्रम्पको नयाँ धम्की आएको हो । यस अघि पनि उनले ईरानलाई अपशब्द र असभ्य भाषामा धम्की दिँदै ईरानी जनतालाई नर्कमा पुर्याउने चेतावनी दिएका थिए ।
ट्रम्पले हालै इरानी भूमिमा खसेका एक अमेरिकी पाइलटलाई बचाउन चलाइएको विशाल ‘रेस्क्यु अपरेसन’ को विवरण पनि सार्वजनिक गरे।
इरानको नियन्त्रण रहेको क्षेत्रमा खसेका पाइलटलाई बचाउन अमेरिकाले २०० सैनिक र २१ वटा अत्याधुनिक विमान परिचालन गरेको थियो।
उद्धारका क्रममा इरानी पक्षबाट भीषण गोलीबारी भएको थियो। सो क्रममा अमेरिकाले आफ्नो प्रविधि इरानको हातमा नपरोस् भनेर आफैँले एउटा विमान बम विष्फोट गराएर नष्ट गरेको ट्रम्पले खुलाए।
मिसन सफल भए पनि राष्ट्रपति ट्रम्प एउटा कुराले भने निकै आक्रोशित देखिएका छन्। यो संवेदनशील सैन्य अभियानको जानकारी पहिल्यै सार्वजनिक भएको भन्दै उनले सुरक्षा संयन्त्रमाथि प्रश्न उठाएका छन्।
“यस्तो गोप्य जानकारी बाहिर आउनु राष्ट्रिय सुरक्षासँगको खेलवाड हो,” ट्रम्पले भने, “यसको कडा छानबिन हुनेछ र दोषीलाई कडा कारबाही गरिनेछ।”
ट्रम्पको यो बयानले तेल आपूर्ति गर्ने मुख्य मार्ग ‘होर्मुज जलडमरुमध्य’ (Strait of Hormuz) को तनावलाई थप चर्काएको छ। यसअघि नै उनले आगामी ४८ घण्टा इरानका लागि भारी हुने चेतावनी दिइसकेका छन्। इरानी राष्ट्रपतिले पनि यसको प्रतिवाद गर्ने बताएपछि खाडी मुलुकमा युद्धको बादल झनै मडारिएको छ।
