तेहरान — इरान ले आफ्नो महत्वपूर्ण तेल निर्यात केन्द्र खार्ग टापु माथि संयुक्त राज्य अमेरिका ले आक्रमण गरे गम्भीर परिणाम भोग्नुपर्ने चेतावनी दिएको छ।
तस्निम समाचार एजेन्सी का अनुसार, एक सैन्य स्रोतले अमेरिकाले यस्तो कदम चालेमा त्यसको प्रतिकार अभूतपूर्व हुने दाबी गरेका छन्। “यदि खार्ग टापुमाथि आक्रमण गरियो भने, अमेरिकाले दोस्रो विश्वयुद्ध पछिको सबैभन्दा ठूलो मूल्य चुकाउनुपर्नेछ,” स्रोतलाई उद्धृत गर्दै समाचारमा उल्लेख गरिएको छ।
स्रोतका अनुसार, अमेरिकाले पछिल्लो समय खार्ग टापुमाथि आक्रमण गर्ने संकेत दिएको छ, जसले क्षेत्रीय तनावलाई थप चर्काएको छ। उनले भने, “पछिल्ला केही सातामा देखिएका सैन्य घटनाक्रमभन्दा फरक र अझ कडा प्रतिक्रिया इरानबाट आउनेछ।”
इरानले यस्तो आक्रमण भएमा रेड सी तथा बाब अल–मन्देब जलडमरूमध्य लगायतका महत्वपूर्ण सामुद्रिक मार्गहरूमा अस्थिरता सिर्जना हुन सक्ने चेतावनी दिएको छ। यसले विश्व व्यापार र ऊर्जा आपूर्तिमा समेत गम्भीर असर पार्न सक्ने बताइएको छ।
सैन्य स्रोतले हर्मुज जलडमरूमध्य को अवस्थालाई लिएर अमेरिका स्वयं द्विविधामा परेको पनि दाबी गरेका छन्। “एकातर्फ, विश्व बजारमा तेलको मूल्य नियन्त्रण गर्न अमेरिकाले इरानी तेलमाथिको प्रतिबन्ध खुकुलो बनाउने संकेत दिएको छ,” उनले भने, “अर्कोतर्फ, उही देशले खार्ग टापुमाथि आक्रमण गर्ने योजना बनाउनु परस्पर विरोधाभासी नीति हो।”
उनका अनुसार, यदि आक्रमण भयो भने पहिलो चरणमै तेल उत्पादन र निर्यातमा अवरोध आउन सक्छ। दोस्रो चरणमा इरानले क्षेत्रीय ऊर्जा पूर्वाधारहरूमा प्रतिकारात्मक आक्रमण गर्न सक्ने चेतावनी दिइएको छ। तेस्रो चरणमा भने अमेरिकाले आफ्नो सैन्य उपस्थिति सुरक्षित राख्न कठिन हुने र ठूलो क्षति व्यहोर्नुपर्ने अवस्था आउन सक्ने उल्लेख गरिएको छ।
विश्लेषकहरूका अनुसार खार्ग टापु इरानको प्रमुख तेल निर्यात केन्द्र भएकाले त्यहाँको सुरक्षा र स्थिरता केवल इरान मात्र नभई विश्व ऊर्जा बजारका लागि पनि अत्यन्त महत्वपूर्ण मानिन्छ। त्यसैले यस क्षेत्रमा कुनै पनि सैन्य कारबाहीले व्यापक अन्तर्राष्ट्रिय प्रभाव पार्न सक्ने देखिन्छ।
हालसम्म यस विषयमा संयुक्त राज्य अमेरिका बाट औपचारिक प्रतिक्रिया आएको छैन। तर बढ्दो तनावले मध्यपूर्व क्षेत्रको सुरक्षा अवस्थालाई थप जटिल बनाउने संकेत देखिएको छ।
