भारत प्रशासित जम्मु कश्मिरमा आज पनि ‘ब्ल्याकआउट’ गरिएको छ । पाकिस्तानले आज पनि आक्रमण गर्ने जोखिमलाई ध्यानमा राख्दै कश्मिरमा ‘ब्ल्याकआउट’ गरिएको भारतीय सञ्चारमाध्यमहरुले जनाएका छन् ।
जम्मु कश्मीरका मुख्यमन्त्री उमर अब्दुल्लाहका अनुसार शहरभर साइरनको आवाज सुनिएको छ । उनले सामाजिक सञ्जालमा लखेको छन्, ‘आज पनि जम्मुमा ब्ल्याकआउट गरिएको छ । साइरनको आवाज पनि शहरभरि सुन्न सकिन्छ । त्यहाँ मानिसहरुलाई घरमै बस्न आग्रह गरिएको छ ।
बिहीबार राति पाकिस्तानले आक्रमण गरेपछि सिमाव्रती जिल्लाहरुमा ‘ब्ल्याकआउट’ गरिएको थियो । पाकिस्तानले आज पनि ड्रोन आक्रमण गरिरहेको भारतीय सञ्चार माध्यमहरुले लेखेका छन् ।
शुक्रबार साँझ पनि जम्मु, पठानकोट, अमृत शहर लगायतका क्षेत्रको आकाशमा पाकिस्तानी ड्रोन देखिएको समाचारमा उल्लेख छ ।
गत अप्रिल २२ का दिन भारत प्रशासित जम्मु कश्मीरको पहलगाम क्षेत्रमा २६ जना पर्यटकको ज्यान जानेगरी भएको आतंककारी आक्रमणको बदलमा भारतले पाकिस्तानविरुद्ध अपरेशन सिन्दूर चलाएको थियो । जसअनुसार उसले बुधबार सबेरै पाकिस्तान र पाकिस्तान प्रशासित कश्मीरका विभिन्न ९ स्थानलाई लक्षित गरी हवाई आक्रमण गरेको थियो । त्यसपछि दुई देशबीच तनाव चुलिएको छ ।
