विराटनगर ।मोरङको बूढीगंगामा बोक्सीको आरोप लगाउँदै एक जना महिलामाथि कुटपिट गर्नेलाई प्रहरीले नियन्त्रणमा लिएको छ । मोरङको बूढीगंगा गाउँपालिका–७ की ५० वर्षीय पारो माझीलाई पक्राउ पक्राउ गरेको हो । उनी गाँउमा झाँक्रीको काम गर्दै आएकी थिईन् ।
प्रहरीका अनुसार ५५ वर्षीय महिलालाई कुटपिट गर्दै र यातना दिई मानव मलमूत्र खुवाएर अमानवीय व्यवहार गरिएको प्रहरीले बताएको छ ।
बिहिबार दिँउसोको उक्त घटनाको जानकारी प्रहरीले साँझ मात्र पाएको थियो ।
प्रहरीका अनुसार धामी झाँक्री भएर झारफुकको काम गर्ने माझीको घरमा लगाइएको अष्टम पूजामा प्रयोग गरिएको दियो हराएको थियो । पूजाको दियो चोरी गरेको आरोप उनले ती महिलालाई लगाएर यातना दिएकी थिईन् ।
जोखाना हेर्दा र तान्त्रिक विधिबाट ध्यान गर्दा दियो चोरेको थाहा भएकाले बोक्सीलाई गर्ने कारबाही गरेको माझीले प्रहरीसमक्ष स्वीकार गरेकी छन् ।
त्यस क्रममा पीडितले आफू बोक्सी नभएको र आफूले दियो समेत नचोरेको भन्दै यातना नदिन र मलमूत्र नखुवाउन पटक पटक आग्रह गरेको प्रहरीको भनाइ छ ।
धामी झाँक्रीको काम गर्दै आएकी माझीलाई पीडित पक्षले दिएको किटानी जाहेरीका आधारमा पक्राउ गरिएको मोरङ प्रहरीले जनाएको छ ।
