एजेन्सी कार्तिक २३ । ७ अक्टोबर शनिबारका दिन हमास लडाकु समुहले इजरायलमा हमला शुरु गरेपछि भएको युद्धमा सबै भन्दा धेरै बालबालिकाहरु प्रभावित भएका छन् । खास गरी ईजरायलले जारी राखेको बमबारीमा गाजामा मात्रै ४ हजार १०४ जना बच्चाहरुको ज्यान गएको छ ।
बिबीसीका अनुसार १२७० बच्चा ईजरायली बमबारीले ध्वस्त बनाएका भवनहरु भत्किएर पुरिदा वेपत्ता भएका छन् । ईजरायलको आक्रमण जारी रहँदा उनीहरुको खोजी समेत हुन सकेको छैन ।
हमासको आक्रमणमा ईजरायलमा पनि ३१ बच्चा मारिएका थिए भने ३० जति हमासले बन्धक बनाएको अनुमान गरिएको छ ।
ईजरायली आक्रमणमा हाल सम्म १० हजार १ सय भन्दा बढी प्यालेष्टाईनी नागरिकको मृत्यु भएको छ । सँयुक्त राष्ट्रसंघ सहित अन्य देशहरुको दबाबका बीच ईजरायलले अस्पताल, सडक, निजी घर, शरणार्थी शिविर, मस्जिद आदीमा भीषण हमला जारी राखेको छ । यस युद्धले गाजामा ठूलो नरसंहार सहित मानवीय संकट पैदा भए पनि अमेरीकी सहयोग र समर्थनमा ईजरायल निरन्तर बमबारी गर्नबाट पछि हटेको छैन ।
