साउन ३० काठमाण्डौँ । राष्ट्रपति विद्यादेवी भण्डारीले नागरिकता विधेयक संसदमा फिर्ता गरेपछि उनीमाथि सत्तारुढ दलहरुले प्रश्न उठाएका छन् । यो एमालेको राजनीतिक दृष्टिकोणका आधारमा राष्ट्रपतिले निर्णय लिएको ती दलका नेताहरुको सार्वजनिक प्रतिकृया आएको छ ।
राष्ट्रपतिले हिजो साँझ विभिन्न प्रश्न उठाँउदै नागरिकता विधेयक पुनः विचार गर्न भन्दै संसदमा फिर्ता पठाएकी थिईन् ।
यो नागरिकता विधेयकको खास गरी विदेशबाट नेपालीसँग विवाह गरेर आउनासाथ नागरिकता दिने प्रावधानको बिरोध हुँदै आएको छ । विभिन्न दल र समुहहरुले राष्ट्रपतिलाई यो विधेयक प्रमाणित नगर्न सुझाव दिएका थिए ।
तर राष्ट्रपतिले यस्तै प्रावधान राखेर पूर्व प्रधानमन्त्री केपी शर्मा ओलीले संसद विघटन गरेपछि जारी गरेको अध्यादेश भने प्रमाणित गरेकी थिईन् । त्यो ओली कार्यकालको अध्यादेश र अहिले देउवा कार्यकालको विधेयक हुबहु रहेको छ ।
यसैलाई टेकेर माओवादी, काँग्रेस लगायतका दलका नेताहरुले राष्ट्रपति एमालेबाट निर्वाचित भएका कारण यो विधेयक फिर्ता भएको टिप्पणी गरेका छन् ।
तर जे भए पनि सार्वजनिक रुपमा यो विधेयकमाथि उठेका सार्वजनिक चासोहरुलाई संसदले संवोधन गर्नु पर्ने माग भने बढेको छ ।
