साउन २३ काठमाण्डौँ । नेपाली काँग्रेस भित्र गठबन्धन कायम राखेर निर्वाचनमा तालमेल गर्दा पार्टीको बहुमत आउने गरी सिट बाँडफाट हुनु पर्ने माग नेताहरुले गरेका छन् ।
आज गठबन्धनको कार्यदलको बैठक बस्नु अघि काँग्रेसले गरेको आन्तरीक परामर्शमा गठबन्धन गर्दा देशव्यापी गर्नु पर्ने र स्वभाविक हुने खालको गर्नु पर्ने बोल्ने नेताहरुले सुझाएका थिए ।
यद्यपि, सभापति देउवाले भने यस विषयमा ठोस जवाफ नदिएको एक नेताले बताए । देउवा जसरी पनि गठबन्धन कायम राखेर चुनावमा जान प्रतिवद्ध रहेका छन् ।
नेताहरुको यस्तो सुझाव आए पनि देउवाले तलमाथि गरेर तालमेल गर्ने निर्णय लिन सक्ने छन् ।
आजै अपरान्ह तीन बजे वालुवाटारमा पाँच दलीय कार्यदलले सिट बाँडफाँटको बारेमा छलफल प्रारम्भ गर्दैछ ।
यसैबीच काँग्रेसले आगामी ३० र ३१ साउनमा देशभरका पार्टीबाट निर्वाचित जनप्रतिनिधिलाई प्रशिक्षण दिने भएको छ । आजको बैठकले यो प्रशिक्षणको मिति तय गरेको हो ।
