असार ३१ काठमाण्डौँ । माओवादी अध्यक्ष प्रचण्ड भारतको राजनीतिक भ्रमणका लागि दिल्ली प्रस्थान गरेका छन् । उनले दिल्ली उड्नु अघि अन्तराष्ट्रिय विमानस्थलमा पत्रकार सम्मेलन गर्दै आफू भारत जानु र चीनीया नेता नेपाल आउनुका बिषयमा कुनै सम्बन्ध नरहेको स्पष्ट पारेका छन् ।
प्रचण्डले सञ्चारकर्मीसँगको कुराकानीका क्रममा यसबारे कुनै अलमलमा पर्न नहुने पनि प्रष्टीकरण दिए।
‘भारतीय जनता पार्टीका प्रेसिडेन्टको औपचारिक निमन्त्रणमा मेरो भ्रमण हुँदैछ,’ प्रचण्डले भने, ‘संयोग जस्तो, चिनियाँ विदेश विभागका प्रमुख नेपाल भ्रमणमा आउने कुरा हुँदा भारतीय विदेश सचिवसँग मेरो कुराकानी हुँदै थियो, त्यतिबेला यसबारे थाहा पनि थिएन।’
नेपालको समग्र विकास र द्विपक्षीय स्थितिलाई बलियो बनाउन आफ्नो भ्रमण महत्वपूर्ण हुने बताए।
‘चिनियाँ नेता आउने र म भारत जाने कुरासँग यो भ्रमणको कुन सम्बन्ध छैन। अनावश्यक कम्फ्युजन कसैलाई नहोस्,’ प्रचण्डले भने।
प्रचण्ड दुई दिनसम्म भारतमा रहनेछन्। प्रचण्डले भाजपा मुख्यालय पनि भ्रमण गर्ने छन् ।
उनले दिल्लीमा मोदीसँग भेट्ने संभावना बलियो छ भने भाजपाका शीर्ष नेतृत्व, भारतीय विदेश मन्त्री र सुरक्षा सल्लाहकारसँग समेत भेट गर्ने छन् ।
