केही दिनयता थुप्रिएको फोहोर नउठाउँदा काठमाडौंका मुख्य सहरमा दुर्गन्ध फैलिएको छ । सहरका चोकमा फोहोरका डंगुर देखिएका छन् । वर्षायाममा चोकचोकमा फोहोरको थुप्रिँदा नाक नथुनी हिँड्नै नसकिने अवस्था आएको छ । त्यसमाथि मुख्य सडकहरुमा नै फोहरको डंगुर त्यसमाथि सवारी साधनले कुल्चदै हिडेको छ । यसले महामारी फैलने खतरासमेत बढाएको छ । तर, जिम्मेवार निकाय काठमाडौं महानगरपालिका भने विभिन्न बहाना बनाउँदै फोहोर उठाउनबाट पन्छिने गरेको छ ।
यतिसम्म कि मुलुककै मुख्य प्रशासनिक क्षेत्र सिंहदरबार छेउछाउ पनि फोहरका डंगुर सडकमा छन् । कुलेश्वर, पुतलिसडक बागबजार, डिल्लबजार लगायत सयौ स्थानमा सडकमै फोहर फालिएको छ ।
फोहोरको थुप्रोबाट आउने दुर्गन्धले स्थानीयवासी आजित छन् भने पैदलयात्रीलाई सास्ती दिएको छ नै गाडी चढ्नेहरु पनि गर्मीमा झ्याल थुनेर हिँड्न बाध्य छन् । फोहोरको दुर्गन्ध चारैतर्फ बढेकाले कति बेला महामारी फैलने हो भन्ने त्रास स्थानीयमा छ ।
सडकमा फोहोर थुप्रिन नदिन आफैं पनि सचेत हुनुपर्ने र यस्तो समस्या नदोहोरिने गरी सबै पक्षले समाधान खोज्नुपर्ने स्थानीय बताउँछन् ।
काठमाडौं महानगरपालिकाले भने हरेकपल्ट नुवाकोटको सिसडोलस्थित ल्यान्डफिल साइट भरिएको र ल्यान्डफिल्ड साइटसम्म फोहोरका गाडीहरु जानसक्ने अवस्था नहुँदा काठमाडौंमा फोहोर थुप्रिएको बताएर पन्छिने गरेको छ ।
उपत्यकावासीले फोहोर नउठ्ने समस्या भोग्न थालेको वर्षौं भइसक्यो । अधिकांश समय बिभिन्न बहानामा फोहरका डंगुर काठमाडौका सयौ स्थानमा थुप्रने गरेको छ । यहि कारण काठमाडौं फोहरको डंगुर थुप्रने शहरको रुपमा परिचित हुदै गएको छ ।
