विराटनगर, २ जेठ । मोरङको रंगेली नगरपालिकाको मतगणना ४६ घण्टापछि पुनः सुरु भएको छ। यसअघि गनिएको ३१३२ मतलाई मान्यता नदिने गरी शून्यबाट मतगणना सुरु भएको हो।
मतपरिणामले पछि पर्दै गएको नेपाली कांग्रेससमेतका दलको विरोधका कारण रोकिएको मतगणना सर्वदलीय सहमतिमा पहिलेको गणना रद्ध गरेर शुन्यबाट सुरु गर्ने सहमतीपछि पुनः मतगणना सुरु गरिएको रंगेलीका मुख्य निर्वाचन अधिकृत रामहरि शर्मा काफ्लेले जानकारी दिए।
उनकाअनुसार पहिलो चरणमा रंगेलीमा १, २ र ३ नम्बर वडाको मतगणना जनता क्याम्पसमा भइरहेको थियो। पहिले गनेको मत फेरि दोहोर्याउने गरी अहिले पुरानै वडाबाट पुनः गणना थालिएको छ। ९ वटा वडा रहेको रंगेलीमा स्थानीय तह निर्वाचनअन्तर्गत वैशाख ३० गते २७२७० मत खसेको थियो।
गठबन्धनमा रहेका कांग्रेस र जनता समाजवादी पार्टी (जसपा)को विरोधपछि मतगणना शनिबार राति ८ बजेदेखि रोकिएको थियो। विरोध सुरु भएपछि एक्लाएक्लै चुनावी मैदानमा रहेका अन्य दलहरु लोकतान्त्रिक समाजवादी पार्टी (लोसपा), नेकपा (माओवादी केन्द्र), सिके राउत नेतृत्वको जनमत पार्टीसमेतले गठबन्धनलाई साथ दिए। रंगेलीमा नेकपा एमाले र राप्रपा पनि एक्लाएक्लै चुनावी मैदानमा छन्।
गणना भइसकेको मतपरिणामअनुसार मेयरका एमाले उम्मेदवार दिलीप बगडिया अग्रवाल १६३१ मतका साथ अगाडि थिए। गठबन्धनबाट कांग्रेसका मोदराज घिमिरेको १०६७ मत थियो। उपमेयरमा एमालेकी भुमा पराजुलीले १६०७ मत र गठबन्धनबाट जसपाका पन्नालाल मण्डलले ४२२ मत पाएका थिए।
निर्वाचन अधिकृत काफ्लेकाअनुसार निर्वाचन आयोग र सीसी क्यामेराको निगरानीमा भइरहेको गणना वैशाख ३१ गते बिहानका राति २ बजेदेखि सुरु भएको थियो। मतगणना जारी रहेका बेला रंगेली–८ मा कांग्रेसबाट वडाध्यक्षको उम्मेदवार रहेका आशिष दोर्जेले आफ्नो मतपेटिका सिल नगरिएको, टुटाएको र फुटाएको अवस्थामा रहेको भनेर निर्वाचन अधिकृतको कार्यालयको ध्यानआकर्षण गराएका थिए। त्यसलगत्तैको विरोधले रोकिएको गणना ४६ घण्टासम्म ठप्प बन्यो। सर्वदलीय सहमतिपछि सोमबार बेलुका ६ बजेदेखि पुनः शून्य बाट सुरु भएको काफ्लेले बताए।
