चितवन, २ जेठ । भरतपुर महानगरपालिकाको मतगणना फेरी अवरुद्ध भएको छ।
गणनाका क्रममा नेकपा एमालेका प्रतिनिधिले कर्मचारीले नै धाँधली गर्न खोजेको आरोप लगाएपछि मतगणना अवरुद्ध भएको हो।
मेयरतर्फ सूर्य र हलोमा एकै छाप लगाउँदा मत बदर भएको र रुख र हँसिया हथौडामा एउटै छाप भएको मतपत्र सदर गरिएको भन्दै एमालेले विरोध गरेपछि गणना अवरुद्ध बनेको हो।
मुख्य निर्वाचन अधिकृतको कार्यालयका अनुसार अहिले सहमतिको प्रयास भइरहेको छ। निर्वाचन अधिकृत रुख र हँसिया हथौडामा मतपत्र पनि बदर गर्न सहमत भएका छन्। तर एमालेले कर्मचारी नै स्वतन्त्र नभएको भन्दै असन्तुष्ट जनाउँदै बाहिरिएपछि गणना सुरु हुन सकेको छैन।
विवादका कारण गणना स्थलभित्र होहल्ला छ ।
मतपत्रमा छाप संकेतका आधारमा सदर वा बदर के गर्ने भन्नेबारे दलका प्रतिनिधिले आपत्ति जनाएपछि आइतबार पनि भरतपुर मतगणना स्थगित भएको थियो ।
पछिल्लो परिणामअनुसार यहाँ नेपाल कम्युनिष्ट पार्टी माओवादी केन्द्र उम्मेदवार रेनु दाहाल ५,३८२ मतका साथ अग्रस्थानमा छन् । दाहाललाई पछ्याइरहेका नेपाल कम्युनिष्ट पार्टी एमालेका विजय सुवेदीले ५,३६७ मत ल्याएका छन् ।
