चितवन, १ जेठ । भरतपुर महानगरपालिकामा माओवादी केन्द्रकी मेयर उम्मेदवार रेणु दाहालले अग्रता कायम राखेकी छन्। ६१७७ मत गणना हुँदा दाहालले २२१२ मतका साथ अग्रता लिएकी हुन्।
उनका निकटतम प्रतिद्वन्द्वी नेकपा एमालेका विजय सुवेदीले २१८९ मत प्राप्त गरेका छन्। सुवेदीभन्दा दाहाल मात्र २३ मतले अगाडि छिन्। तेस्रोमा जगन्नाथ पौडेलले ७३२ मत पाएका छन्।
उपमेयरतर्फ नेपाली कांग्रेसका चित्रसेन अधिकारीले २४३६ मतका साथ अग्रस्थानमा छन् भने उनका प्रतिद्वन्द्वी राप्रपाकी हिमला गुरुङले १७६५ मत पाएकी छन्। भरतपुरमा दुई गठबन्धनबीच प्रतिस्पर्धा रहेको छ।
वडा नं २ मा वडाध्यक्षमा गठबन्धनबाट नेपाली कांग्रेसका मनोज रानाभाटले एक हजार २४९ मत प्राप्त गर्दा नेकपा (एमाले)का उम्मेदवार कृष्ण केसीले एक हजार २२५ मत प्राप्त गरेका छन् । सो वडामा दुई हजार ९०० मत गणना भएको छ । वडामा कूल चार हजार ८०८ मत खसेको छ ।
यसअघि वडा नम्बर १ मा गठबन्धनकै तर्फबाट नेपाली कांग्रेसका केशव महर्जन विजयी भएका थिए । भरतपुर महानगर पालिकामा एक लाख २७ हजार ८३९ मत खसेको छ । यस्तै जिल्लाका अन्य पालिकाहरुमा रत्ननगर, खैरहनी, कालिका, राप्तीमा पाँच दलीय गठबन्धनको अग्रता रहेको छ भने माडी र इच्छाकामनामा नेकपा (एमाले)ले अग्रता कायम गरेको छ ।
