वैशाख ३०, गोरखा । गण्डकी गाउँपालिका–६ भुम्लिचोकस्थित बालकी आधारभूत विद्यालय मतदान केन्द्रको मतदान पुनः सुरु भएको छ ।नेपाली कांग्रेस र माओवादी केन्द्रका कार्यकर्ताबीच विवादका कारण करिब आधा घण्टा स्थगित भएको मतदान प्रकृया सर्वदली बैंठक बसेर सहमती गरेपछि पुनः सूचारु भएको हो ।
मतदानस्थल बाहिर माओवादी र कांग्रेसबीच मतदानको विषयलाई लिएर विवाद बढेपछि मतदान स्थगित भएको थियो । त्यहाँ सर्वपक्षीय बैठक राखेर पुनः मतदान सुरु गरेको गण्डकी गाउँपालिकाका निर्वाचन अधिकृत वासुदेव रेग्मीले बताए ।
‘मतदानस्थल भन्दा तीन सय मिटर बाहिर घरयासी विवाद चुनावमा परिणत भएछ, विवादमा दुई पक्षीय भइहाल्ने भयो, असुरक्षित वातावरण बनेपछि केहीबेर मतदान स्थगित भएको थियो, अहिले पुनः सुरु गर्यौं,’ उनले भने ।
यसअघि केन्द्रको तीन सय मिटर क्षेत्रभित्र ढुंगा हानाहान हुँदा मतदान रोकिएको थियो । शुक्रबार बिहान ११ः१० बजेदेखि मतदान प्रक्रिया स्थगित भएकोमा बैंठकपछि सूचारु भएको मतदान अधिकृत अनुप देवकोटाले जानकारी दिए ।
यसअघि गण्डकी गाउँपालिकाको ज्ञानमार्ग मावि मतदान केन्द्रमा पनि माओवादीले अवाञ्छित गतिविधि गरेपछि दोहोरो झडप भएको थियो । झडपछि हवाई फायरिङ भएको थियो ।
ज्ञानमार्ग केन्द्र सुचारु भएलगत्तै बालकीमा झडप भएको हो ।गण्डकी गाउँपालिकाको तीनवटा मतदान केन्द्र विगतका चुनावदेखि नै माओवादी केन्द्रले कब्जा गर्ने गरेको थियो । ती केन्द्रहरुलाई जिल्ला सुरक्षा समितिले अति संवेदनशीलको सूचीमा राखेको छ । अहिले मतदान भईरहेको छ ।
