तनहुँ, ३० वैशाख । नेपाली कांग्रेसका तर्फबाट व्यास नगरपालिकाका मेयरको उम्मेदवार वैकुण्ठ न्यौपानेलाई स्थानीयको बिरोधपछि मध्यरातमा प्रहरीले उद्धार गरेको छ। मौन अवधिमा बिहीबार राती व्यास–१२ छिर्कने पुगेका न्यौपानेलाई स्थानीयले घेरेपछि सशस्त्र प्रहरी र नेपाल प्रहरीले न्यौपानेलाई उद्धार गरेको हो।
राति १२ बजे छिर्कनेबाट उद्धार गरी न्यौपानेलाई दमौली ल्याइएको प्रहरीले बताएको छ। न्यौपाने मौन अवधिमा मतदाता प्रभावित गर्न छिर्कने पुगेको स्थानीयको आरोप छ।
न्यौपानेले भने आफू साथीको घरमा आएको र पैसा बाँडेको आरोप निराधार रहेको बताएका छन्। उनले आफूलाई लाञ्छित गर्ने कोशिस गरिएको बताएका हुन् ।
न्यौपाने कांग्रेसका बरिष्ठ नेता रामचन्द्र पौडेलको गृहनगरबाट मेयरका उम्मेदवार हुन्। व्यासको निर्वाचनलाई वरिष्ठ नेता पौडेल र पार्टीबाट कारबाहीमा परेका पार्टीका पुर्व सहमहामन्त्री गोविन्दराज जोशीको प्रतिष्ठाको लडाँईको रुपमा हेरिएको छ। काँग्रेसबाट मेयरमा न्यौपानेलाई अगाडि बढाइएको हो भने एमाले जोशी समूहबाट दिपक जोशी मेयरको प्रतिष्पर्धामा छन्।
