सुनसरी, २४ वैशाख। नेकपा एमालेका अध्यक्ष केपी ओलीले नेकपा माओवादी केन्द्रका अध्यक्ष प्रचण्डले छोरी रेणु दाहाल हारेमा देशमा दुर्घटना हुन्छ भनेर जनतालाई धम्क्याएको टिप्पणी गर्नु गर्नुभएको छ ।
शनिबार इटहरीमा आयोजित एमालेको चुनावी सभालाई सम्बोधन गर्दै ओलीले चुनावमा हार्ने डरले पाँच दलबीच गठबन्धन गरेको समेत बताउनु भयो । उहाँले प्रचण्डलाई चकचके बाँदरको शंज्ञा समेत दिनुभएको छ । ‘एउटा चकचके बाँदर रुखमा चढेर बदमासी गरिरहेको हुन्छ,’ प्रचण्डलाई बाँदरको संज्ञा दिँदै उहाँले भन्नुभयो, ‘प्रचण्ड त्यहि रुखमा चढेर चकचक गरिरहने बाँदर हो ।’
ओलीले एमालेसँग चुनाव हार्ने डरका कारण पाँच दलिय गठबन्धनले वडासम्म चुनावी तालमेल गरेको आरोप लगाउनुभयो । पाँच दलीय गठबन्धनलाई पराजित गर्न एमाले एक्लै काफी रहेको उहाँको दाबी छ ।
अध्यक्ष ओलीले आफ्नो पार्टीका उम्मेदावारहरूलाई निर्वाचित गराए धरान र इटहरीको विकासको जिम्मा आफूले लिने प्रतिवद्धता व्यक्त गर्नुभयो ।
देशकै विकासको नेतृत्व गर्ने प्रतिवद्धता जनाएकाले आफ्ना उम्मेदवारलाई विजय गराए इटहरी र धरानलाई प्राथमिकतामा राखेर विकास निर्माणका काम अघि बढाउने बताउनुभयो ।
अध्यक्ष ओलीले लोकप्रियताका कारण वृद्धदेखि बालकसम्म सबैले आफूलाई ‘आइलभयू’ भन्न थालेको बताउनुभयो ।
