बैशाख २२ चितवन । नेकपा माओवादी केन्द्रका अध्यक्ष प्रचण्डले काँग्रेसले ईमान्दार भएर हँसिया हथौडामा मत दिएमा यो गठबन्धन अझै २० वर्ष सम्म लैजान आफू प्रतिवद्ध रहेको बताएका छन् ।
आज चितवनमा आयोजित पाँच दलीय गठबन्धनको चुनावी सभालाई संवोधन गर्दै प्रचण्डले देशका लागि , लोकतन्त्र र संविधानको रक्षाका लागि गठबन्धन बनेकाले भरतपुरमा हँसिया हथौडामा मत दिन्न भन्दा देश दुर्घटनामा जान सक्ने चेतावनी दिए ।
उत्साहजनक ढंगले रेणु र चित्रसेन अधिकारीलाई मत दिनुहोस् , गठबन्धन अगाडी जान्छ, सहमति , सहकार्य र एकताको विकल्प छैन , प्रचण्डले भने ।
‘प्रचण्ड’ ले नेकपा एमालेका अध्यक्ष केपी शर्मा ओलीले हारेको वास्तविकता जनताले नबुझ्दा आफू खिन्न हुनुपरेको बताएका छन् ।
‘हारेको प्रचण्ड, माधव नेपाल होइन केपी ओली हो,’ अध्यक्ष प्रचण्डले भने, ‘यो कुरा तपाईँले नबुझेको सुन्न पर्दा खिन्न महसुष भएको छ ।’
उनले ‘लकिरको फकिर’ भएर लोकतन्त्रको रक्षा हुन नसक्ने बताए । उनले गठबन्धनको विरोध गरिरहेका कांग्रेसका नेता तथा कार्यकर्तालाई इङ्गीत गर्दै भने, ‘विधि, पार्टी र पद्धती बाहिर गएर कोही व्यत्ति विर पनि हुने स्थित अहिले नेपालमा छैन ।’
सम्बोधनका क्रममा उनले सहमति सहकार्य र एकता आजको पनि आवश्यकता रहेको जनाए । गठबन्धन बनेको दिनदेखि यसलाई तोड्ने प्रयास भएका दाबी उनले गरे ।
‘हरेक संकट टारेर आजको विन्दुसम्म ल्याइएको छ । तपाईँको साथ सहयोग भयो भने, उत्प्रेरणा भयो भने यो गठबन्धन दशकौं जान्छ । यो स्वभाविक र प्राकृतिक गठबन्धन हो,’ अध्यक्ष प्रचण्डले भने ।
