चैत्र २० चितवन । अघिल्लो निर्वाचनमा काँग्रेस र माओवादीको सहकार्यमा तालमेल भएको चितवनको भरतपुर महानगरपालिकामा यस पटक भने सकस पर्ने देखिएको छ ।
यस पटक भरतपुर महानगरको मेयर आफूहरुले पाउनु पर्ने अन्यथा एक्लै निर्वाचन लड्ने चितवन काँग्रेसले निर्णय गरेको छ ।
भरतपुर महानगरको मेयर हाल माओवादीबाट निर्वाचित रेणु दाहाल रहेकी छन् ।
यस पटक माओवादीले सो महानगर दोहोर्याएर लिने सार्वजनिक रुपमै संकेत गरिरहेका बेला काँग्रेसको सो निर्णयले चितवनमा तालमेल हुने नहुने आशंका बढेको छ ।
काँग्रेस केन्द्रीय समितिको बैठकले पनि गठबन्धन गर्ने सैद्धान्तिक निर्णय गरेपनि तल्लो तहलाई बढी अधिकार दिएकाले चितवनमा सकस पर्ने देखिएको हो ।
भरतपुर छाड्न नचाहने माओवादी पनि मेयर दाहालले राम्रै काम गरेकाले एक्लै लडेपनि जितिने आन्तरीक निष्कर्षमा रहेको बुझिएको छ ।
उता एमालेका देवी ज्ञवाली पनि मेयरमा लड्ने योजनामा छन् । काँग्रेस जिल्ला सभापति राजेश खनालले मेयर काँग्रेसले नपाए एक्ला एक्लै चुनावमा जाने निर्णय भएको बताए ।
