कञ्चनपुर चैत्र २० । कन्चनपुरमा चुनावका मुखमा एमालेबाट निर्वाचित मेयर सहितका जनप्रतिनिधि एकीकृत समाजवादीमा प्रवेश गरेका छन् । चुनावको मुखमा पार्टी छाडेकाले एमालेलाई जिल्ला र नगरमा धक्का पुगेको छ ।
नेकपा (एमाले) बाट निर्वाचित भएका बेदकोट नगरपालिकाका नगर प्रमुख अशोककुमार चन्द सहितका जनप्रतिनिधि र नेता कार्यकर्ता आज नेकपा एकीकृत समाजवादीमा प्रवेश गरेका छन् । आइतबार बेदकोटको दैजीमा आयोजित आमसभामा एकीकृत समाजवादीका अध्यक्ष माधवकुमार नेपालले नगर प्रमुख चन्दसहित वडाध्यक्ष र कार्यपालिका सदस्य लगायतका जनप्रनिधिहरु पार्टी प्रवेश गराएका हुन् ।
एमालेमा अपहेलित र अपमानित भएपछि त्याहाँ बस्न नसकेर एकीकृत समाजवादी रोजेको मेयर चन्दले बताए । उनले पूर्व माओवादी पनि एमाले भित्र अपमानित भईरहेको दाबी गरे ।
एमालेको पुस अन्तिममा सम्पन्न जिल्ला कमिटीको अधिवेशनमा चन्द सचिवमा झिनो मतले पराजित भएका थिए । पराजय स्वीकार गर्दा पनि आफ्नो प्यानलका निर्वाचित साथीहरुलाई कुनै पनि जिम्मेवारी नदिएको भन्दै उनी रुष्ट बनेका थिए ।
