चैत्र २० काठमाण्डौँ । प्रधानमन्त्री शेर बहादुर देउवाले यस पटकको आफ्नो भारत भ्रमणका क्रममा लिपुलेक, लिम्पियाधुरा र कालापानी सहित सीमा विवाद वार्ता मार्फत समाधान गर्न राखेको प्रस्तावलाई भारतले सकारात्मक रुपमा लिएको छ ।
भारतले ७६ साल यता पहिलो पटक वार्ताका लागि सकारात्मक संकेत दिएको हो ।
देउवाले मोदीसँगको द्धिपक्षीय भेटमा सीमा विवादको बारेमा कुरा राखेका थिए । वार्ता गर्न मोदीले सकारात्मक संकेत दिएको सरकारी स्रोतले जनाएको छ ।
भारतको तर्फबाट पनि सीमा विवाद राजनीतिकरण नगरी संवाद मार्फत समाधान गर्नु पर्ने बताएको थियो ।
नेपाली भूमिहुँदै मानसरोबर जाने बाटो भारतले एकतर्फी रुपमा खनिरहेको छ । नेपालले त्यतिखेर सो कार्यको विरोध गर्दै महाकालीसँग जोडिएका तीनै क्षेत्रलाई नक्सामा समावेश गरेर चुच्चे नक्सा ल्याएपछि भारत रुष्ट बनेको थियो ।
त्यो बेला नेपालमा चौतर्फी बिरोध भएको थियो भने भारतलाई पटक पटक वार्ताका लागि पत्राचार गर्दा पनि भारतले सकारात्मक रुचि देखाएको थिएन ।
तर सम्बन्ध सुधार्न भन्दै भारत पुगेका प्रधानमन्त्री देउवाले यो पटक खुलेर यी विषय उठाएका हुन् ।
भारतले शान्तिपूर्ण रुपमा दुई देशीय सीमा समस्या समाधान गर्न सकारात्मक संकेत दिनु महत्वपूर्ण कुरा भएको कुटनीतिक जानकार दिनेश भट्टराई बताउछन् ।
नेपाल र भारतबीच थुप्रै ठाँउमा सीमा विवाद रहँदै आएको छ ।
