चैत्र १६ काठमाण्डौँ । बिहे गर्ने कुराकानी छिन्न घरैमा आएका युवासँग सहमतिमै यौन सम्बन्ध बनाएर पछि बिहे नहुने भएपछि बलात्कारको मुद्धा दर्ता गरेकी अछामकी एक युवतीलाई अदालतले साढे ३ वर्ष जेल सजाय तोकेको छ । साथै आरोपी युवालाई सफाई दिएको छ ।
न्यायाधीश नविन कुमार जोशीले बलात्कारको झुटा आरोप लगाउने कमलबजार नगरपालिकाकी १९ वर्षीय युवतीलाई तीन वर्ष ६ महिना जेल सजाय सुनाएको हो।
ती युवतीले रामारोशन गाउँपालिका ४ बाटुलासैनका २० वर्षीय नन्दराम खनाललाई जबरजस्ती गरेको भन्दै फागुन १० गते जिल्ला अदालत अछाममा मुद्दा दायर गरेकी थिइन्। विहेको लागि कुरा गर्न खनाल आफन्तसहित माघ १५ गते ती युवतीको घरमा गएका थिए। सोही दिन युवतीकै घरमा एकै कोठामा अलग्गै सुतेपनि राति एक पटक जबरजस्ती बलात्कार गरेको अभियोग लगाएकी थिईन् ।
विवाह गरौंभन्दा युवकले घरमा मान्छे वितेको र उमेर पुगेपछि विहे गरौँलाभन्दा रिसले मुद्दा दायर गरेको ती युवतीले अदालतको बकपत्रमा स्वीकारेपछि अदालतले उनलाई उल्टै सजाय दिएको हो ।
पीडित भनिएकी युवतीले रिसले जाहेरी दिएको युवकलाई झुटा मुद्दामा फसाउन खोजेको तथ्य फेला परेको फैसलामा उल्लेख गरिएको छ।
