चैत्र ११ ललितपुर । नेपाली काँग्रेस केन्द्रीय कार्यसमितिको बैठक आज बस्दैछ । दिँउसो दुई बजे सानेपा स्थित पार्टी कार्यलयमा बस्ने बैठकमा घर घर जाऔँ, काँग्रेसलाई जिताऔँ अभियानको प्रारम्भिक समिक्षा हुने नेताहरुले बताएका छन् । त्यसपछि आजको बैठकमा चुनावी तालमेलको बारेमा निर्णय गराउने तयारीमा सभापति एवं प्रधानमन्त्री देउवा रहेको उनी पक्षीय नेताहरुको दाबी छ ।
एमसीसी अनुमोदन, सरकार सञ्चालन एवं संसद विघटन बिरुद्धको आन्दोलनको सहकार्य सबैलाई ध्यान दिएर आगामी निर्वाचनमा पनि तालमेल र सहकार्य गर्ने देउवाले बताउदै आएका छन् ।
तालमेलको मोडालिटी र प्रकृया भने टुंगो लागिनसके पनि गठबन्धनमा रहेका दलहरुबीच मात्र तालमेल हुनु पर्ने र गठबन्धन बाहिर रहेका दलहरुसँग तालमेल हुन नहुने पक्षमा काँग्रेस रहेको छ ।
काँग्रेस भित्र शेखर कोईराला र गगन थापा समुहले तालमेलको बिपक्षमा आवाज उठाए पनि देउवासँग स्पष्ट बहुमत रहेकाले उनले यो निर्णय गराउने ती नेताको दाबी छ ।
चुनावी तालमेलको आधिकारीक निर्णय भईसकेपछि माओवादी, एकीकृत समाजवादी र जसपाका शीर्ष नेतासँग देउवाले छलफल गरेर अन्य विषय टुंगो लगाउने छन् ।
मुख्यतयाः केन्द्रबाट महानगर र उपमहानगरको भागबण्डा मिलाउने र अरु तल्लो कमिटिहरुले आवस्यकता अनुसार तालमेल गर्ने गरी पार्टीहरुबीच सहमतिको संभावना बढेको छ ।
