काठमाडौँ, २२ फागुन । प्रधानन्यायाधीश चोलेन्द्रशम्शेर जबराविरुद्ध परेको महाअभियोग प्रस्ताव सम्बन्ध अध्ययन गर्न महाभियोग सिफारिस समिति गठन गरिएको छ । प्रतिनिधिसभाको आइतबारको बैठकले महाभियोग सिफारिस समिति गठन गर्ने प्रस्ताव बहुमत स्वीकृत गरेको हो ।
समितिमा संसद् अवरोध गरिरहेको प्रमुख प्रतिपक्षी दल एमालेका प्रतिनिधि पनि छन् । प्रधानन्यायाधीश जबराविरुद्ध फागुन १ महाभियोग प्रस्ताव दर्ता भएको थियो ।
बैठकमा सरकारले ‘अख्तियार दुरुपयोग अनुसन्धान आयोगको एकतिसौं वार्षिक प्रतिवेदन, आर्थिक वर्ष २०७७र७८’ प्रतिनिधिसभा बैठकमा पेस गरेको छ । प्रधानमन्त्री शेरबहादुर देउवाको तर्फबाट कानुन, न्याय तथा संसदीय मामिलामन्त्री दिलेन्द्रप्रसाद बडूले सो प्रतिवेदन पेस गरेका हुन् ।
बैठकमा सभामुख सापकोटाले बलात्कारको अभियोगमा पक्राउ परेका सांसद मोहन बानियाँको बाँके जिल्ला प्रहरी कार्यालयले पठाएको पत्र पनि पढेर सुनाएका थिए ।
प्रतिनिधिसभाको अर्को बैठक यही फागुन २९ गते आइतबार दिउँसो १ बजेका लागि बोलाइएको छ ।
महाअभियोग सिफारिस समितिमा एमालेको तर्फबाट विष्णु पौडेल,लालबाबु पण्डित,शिवमाया तुम्बाहाम्फे, कृष्णभक्त पोखरेल तथा कांग्रेसको तर्फबाट मिनबहादुर विक, रामबहादुर विष्ट रहेका छन् । यस्तै माओवादीको तर्फबाट यसोदा सुवेदी, रेखा शर्मा र नेकपा एसका कल्याणी खड्का, लोसपाबाट एकवाल मियाँ, जसपाका प्रमोद साह समितिमा रहेका छन् ।
