नेकपा एमालेले सर्वोच्च अदालतका चार न्यायाधीशलाई महाअभियोग लगाउने संकेत दिएको छ । प्रधानन्यायधीश चोलेन्द्र शमशेर जबरामाथि सत्तारुढ दलहरुले महाअभियोग लगाएपछि संसद पुनस्थापनाको निर्णयमा सहभागी अन्य चार न्यायधीशलाई पनि महाअभियोग लगाउने एमालेले तयारी गरेको हो ।
काउन्टरको रुपमा यो मआअभियोग लगाउने बारेमा छलफल भएको र आजको संसदीय दलको बैठकबाट यस विषयमा निर्णय हुने एक एमाले सांसदले जानकारी दिए ।
यद्यपि, आधिकारीक निर्णय संसदीय दलको बैठकले नगर्दा सम्म यसै भन्न सकिन्न उनले भने । हिजो प्रधानन्यायधीश बिरुद्धको महाअभियोगपछि एमालेले चुनाव सार्ने षड्यन्त्र भन्दै कडा प्रतिवाद गर्ने निर्णय गरेको थियो ।
सर्वोच्चका न्यायाधीशहरू दीपककुमार कार्की, मीरा खड्का, ईश्वरप्रसाद खतिवडा र डा. आनन्दमोहन भट्टराईलाई महाअभियोग लगाउनुपर्ने धारणा एमाले भित्र उठिरहेको छ ।
असार २८ गतेको फैसलाले अहिलेको अस्थिरता निम्तिएको ठहर गर्दै एमालेले प्रधानन्यायधीशलाई महाअभियोग लगाउने भए त्यो फैसला दिने अन्य चार न्यायधीशलाई समेत महाअभियोग लगाउनुपर्ने तर्क गरेको छ।
असार २८ गते सर्वोच्च अदालतले संसद पुनस्थापना गर्दै शेरबहादुर देउवालाई प्रधानमन्त्री बनाउन परमादेश दिएको थियो। त्यसकै लागि सत्ता गठबन्धनले कायममुकायम प्रधानन्यायाधीश दीपककुमार कार्कीलाई प्रयोग गरेर अदालतमा आफूले भने अनुसार फैसला गराउन खोजेको एमालेको आरोप छ।
एमालेको अर्को आशंका आफूले कारबाही गरेका माधव नेपालसहित १४ सांसदको निर्णय बदर हुनसक्ने भन्ने समेत छ।
