नेकपा माओवादी केन्द्रका अध्यक्ष प्रचण्डले कुनै पनि विदेशी आयोजना वा परियोजना लागू गर्ने कि नगर्ने भन्ने आधारमा यो गठबन्धन बनेको नभई प्रतिगमनका बिरुद्ध संविधान र लोकतन्त्रको रक्षाका निम्ती गठबन्धन तयार भएकाले यो त्यति सजिलो नभत्किने बताएका छन् ।
आज पार्टी मुख्यालय पेरिसडाँडामा जनयुद्ध दिवसको अवसरमा आयोजित कार्यक्रममा प्रचण्डले अहिले गठबन्धन भत्काउने र प्रतिगामीहरु ब्युतिने कोशिस गरीरहेको भन्दै गठबन्धन सजिलै भत्किन नहुनेमा जोड दिएका हुन् ।
अहिले गठबन्धन तोडेर सरकार भत्काउने प्रयास भईरहेको भन्दै माओवादीलाई कमजोर बनाउने , अहिले जनयुद्धले स्थापित एजेण्डाहरु समाप्त पार्न प्रतिगामीहरु सल्बलाई रहेको प्रचण्डको भनाई छ ।
जनयुद्धमा भएको दमनको स्मरण गर्दै उनले टाउको काटेर झोलामा ल्याउन ईनाम दिँदा समेत जनताका कारण आफूहरु हजारौँ शहीदहरुको बलिदानबाट जनताका कारण सुरक्षित रहेको भन्दै अहिले पनि भिन्न रुपले संघर्ष भईरहेको बताए ।
परिवर्तन उल्ट्याउनका लागि अहिले पनि नेतृत्वलाई बदनाम गर्ने, कमजोर पार्ने कोशिस भईरहेको उनले बताए ।
उनले मधेश सरकारले ऐतिहासिक रुपले जनयुद्ध दिवस मनाउने निर्णय गरेकोमा स्वागत गर्दै केन्द्र सरकारलाई समेत जनयुद्ध दिवस मनाउन आग्रह गरे ।
