२८ माघ, वीरगञ्ज । नेकपा एकीकृत समाजवादी पार्टीका अध्यक्ष एवं पूर्वप्रधानमन्त्री माधव कुमार नेपालले यथास्थितिमा एमसीसी पारित गर्न नसकिने स्पष्ट पारेका छन् ।
बीरगञ्जमा पत्रकारहरुसँग कुरा गर्दै अध्यक्ष नेपालले यही अवस्थामा एमसीसीप्रति आखाँ चिम्लिएर समर्थन गर्न नसकिने बताए ।
उनले एमसीसीप्रति नेपालको जनमत विभाजित रहेको भन्दै जनतालाई स्पष्ट नपारी , प्रश्नहरुको निरुपण नगरी एमसीसी अगाडी बढाउन नसकिने बताए ।
एमसीसी अनुमोदनको समय पर सारेर थप छलफल गरेर अगाडी जाँदा राम्रो हुने भन्दै नेपालले एमसीसीले सात प्रश्नको जवाफ दिनु पर्ने बताए ।
जस अनुसार :
पहिलो, यो इन्डोप्यासेफिक रणनीतिको अंग हो कि होइन ?
दोस्रो, यो अमेरिकाको सुरक्षा रणनीति अन्तर्गत पर्छ कि पर्दैन ? सैन्य संलग्नता छ कि छैन ?
तेस्रो, ट्रान्समिसन लाइन तलको भूभाग वा सडक बनाउँदा नेपालको सार्वभौम अधिकार रहन्छ कि रहँदैन ।
चौथो, निर्माणको काममा चाहिने श्रमशक्तिमा योग्यता क्षमता अनुसार नेपाली प्रयोग गर्न पाइन्छ कि पाइँदैन ?
पाँचौ, त्यसबाट उत्पन्न हुने बौद्धिक सम्पत्तिमा नेपालको अधिकार सुनिश्चित हुन्छ कि हुँदैन ?
छैठौं, त्यसको अडिटिङ गर्ने हक नेपालको अडिटर जनरलले प्राप्त गर्छ कि गर्दैन ?
सातौं, एमसीसीसँग जोडिएको कानुनको बारेमा स्पष्ट धारणा आउनुपर्छ । आफूखुशी नयाँ–नयाँ कानुन बनाउँदै जाँदा नेपालको हितमा असर गर्छ भने त्यस्तो कुरालाई स्वीकार गर्न सक्छ कि सक्दैन ?
यी प्रश्नहरुको जवाफ उचित ढंगले एमसीसीले दिनु पर्ने नेपालको भनाई छ ।
