विश्वको सर्र्वोच्च शिखर सगरमाथाको हिँउ पग्लिने क्रम बढेको वैज्ञानिकहरुले चेतावनी दिएका छन् । २ हजार वर्षमा जमेको हिँउ २५ वर्षमै पग्लिन थालेको भन्दै उनीहरुले चिन्ता जनाएका छन् । यसका लागि मानव प्रेरित जलवायु संकट भएको अध्ययनले देखाएको छ । यसले जलवायु परिवर्तनको गंभीर परिणाम देखिन शुरु भएको पनि जनाएको छ ।
यसको गंभीर असरका रुपमा हिमस्खलन, पानीका स्रोतहरु सुक्ने, बाढी आउने जस्ता समस्याहरु देखिँदै गएका छन् । कतिपय हिम श्रृखलामा हाल सम्म एक सय ८० फिट बरफ पग्लिसकेको अनुसन्धानमा दाबी गरिएको छ । पृथ्वीको कुल एक अर्ब ६० करोड जनसंख्या पिउने पानी, सिचाई र उर्जाका लागि हिमश्रृखलाबाट आउने पानी प्रयोग गर्दछन् । बरफ जम्न जति समय लागेको थियो त्यसको ८० गुण तीव्र गतिमा यो पग्लिन थालेको शोधकर्ताहरुको तर्क छ ।
नेचर पोर्टफोलियो जर्नल क्लाईमेट एडं एटमसफेयरिक साईन्समा यो रिपोर्ट प्रकाशित छ । युनिभर्सिटी अफ मेनका ६ वैज्ञानिकहरु र पर्वतारोही समेतको टिमले २०१९ मा ग्लेसियरहरुको भ्रमण गरी १० मिटर लामो बरफका टुक्राहरु एकत्रित पारेर अनुसन्धान गरेका थिए । यस विश्व विद्यालयका जलवायु परिवर्तन संस्थानका निर्देशक पोल मेवेस्कीले १९९० को दशकको आखिरी समयबाट यो परिघटना विकसित भएको देखिएको बताए ।
