नेकपा माओवादी केन्द्रका वरिष्ठ नेता नारायणकाजी श्रेष्ठले वर्तमान अवस्थामा यथास्थितिमा आफ्नो पार्टीले एमसीसीलाई समर्थन गर्न नसक्ने स्पष्ट पारेका छन् ।
उनले माओवादी राष्ट्रिय सार्वभौमिकता, स्वाधीनता र राष्ट्रिय हितलाई सर्वोपरि राख्छ र त्यसका निम्ति दृढ रूपमा प्रतिबद्ध छरहेको पनि बताएका छन् ।
सामाजिक सञ्जालमा आफ्नो धारणा राख्ने नेता श्रेष्ठले एमसीसी पारित नहुनासाथ गठबन्धन टुट्छ भनेर प्रधानमन्त्री देउवाले अभिव्यक्ति आजको बिन्दुसम्म नदिएको पनि स्पष्ट पारेका छन् ।
श्रेष्ठले लेखेका छन्, कुनै भ्रममा नपरौँ, प्रम देउवाले एमसिसीसँगको सम्झौता पारित नगरे सत्तारुढ गठबन्धन तोडिन्छ भनेर भन्नुभएको भन्ने सत्य होइन । आजको बिन्दुसम्म उहाँले त्यसो भन्नुभएको छैन । गठबन्धनमा एमसिसी कम्प्याक्ट सम्झौता पारित गर्ने सहमति भयो भन्ने कुरा पनि सत्य होइन । कमसेकम हाम्रो पार्टी यथास्थितिमा त्यसको पक्षमा छैन ।
