आफू प्रधानमन्त्री भएका बेला कोरोना आशिंक रुपमा देखा पर्दा नपर्दै महिनौ सम्म लकडाउन गरेका एमाले अध्यक्ष केपी शर्मा ओलीले अहिले आफै कोरोना संक्रमित भएका बेला स्वास्थ्य मापदण्ड र सरकारी आदेश विपरीत सार्वजनिक कार्यक्रममा सहभागी भएको पाईएको छ । माघ ११ गते अध्यक्ष ओली संक्रमित भएको पार्टीले विज्ञप्ति नै निकालेर जानकारी दिएको थियो । त्यसको भोलीपल्टै हिजो बालकोटमा एमालेको युवा संघले गरेको रक्तदान कार्यक्रममा ओली उपस्थित भएका थिए । सो बेला उनले युवा संघका अध्यक्ष महेश बस्नेतको हातबाट उपहार समेत लिएको देखिन्छ ।
जिल्ला प्रशासन कार्यलयले भेला, सम्मेलन, सभा जुलुश नगर्न भनिरहेका बेला प्रतिपक्षी दलका नेता नै कोरोना प्रोटोकलको उलंघन गर्दै सार्वजनिक कार्यक्रममा हिँडेको खबर सार्वजनिक भएपछि आलोचना भईरहेको छ । कोरोना प्रोटोकल अनुसार संक्रमित व्यक्तिले कम्तीमा सात देखि १४ दिन सम्म आईसोलेसन ( एकान्तवासमा) बस्नु पर्दछ ।
