नेकपा (माओवादी केन्द्र) ले आज देशभरका वडाहरुमा आज सम्मेलन गर्दैछ । माओवादीले ‘नयाँ क्रान्तिकारी विचार र नयाँ क्रान्तिकारी पार्टी निर्माण गरौँ’ भन्ने नारासहित सम्मेलन गर्ने भएको हो । समाजवादी क्रान्ति पूरा गर्ने दिशामा अघि बढ्न माओवादीले तलैदेखि पार्टी पुनसंरचना गर्ने नीति लिए अनुरुप वडा सम्मेलन शुरु भएको हो ।
वडा सम्मेलनको उद्घाटन अध्यक्ष प्रचण्डले भर्चुअल माध्यमबाट बिहान ११ बजे गर्ने कार्यक्रम रहेको माओवादीको निर्वाचन समितिले जनाएको छ ।
माओवादीले वडा समितिको चयन गर्दा सकेसम्म सर्व सहमतिमा गर्न सबै वडालाई आग्रह गरेको छ । निर्वाचन हुने अवस्था आएको खण्डमा मर्यादित तरिकाले पार्टीको आन्तरिक लोकतन्त्रका रुपमा बुझेर सोही अनुसारको भूमिका निर्वाह गर्न पार्टी प्रवक्ता कृष्ण बहादुर महराले विज्ञप्ति जारी गरी अपील गरेका छन् ।
माओवादीले यही मङ्सिर ११ गते सबै पालिकामा र मङ्सिर २५ गते सातै प्रदेशमा नेतृत्व चयनका लागि सम्मेलन गर्दैछ । आगामी पुस ११, १२ र १३ गते काठमाडौँमा राष्ट्रिय सम्मेलनको आयोजना गरिएको छ । माओवादीले गठन गरेको केन्द्रीय निर्वाचन आयोगले निर्वाचन प्रयोजनका लागि प्रदेशमा सात सदस्यीय, पालिकामा पाँच सदस्यीय र वडा तहमा तीन सदस्यीय निर्वाचन समिति गठन गरेको छ ।
