कार्तिक २८, काठमाडौँ । प्रधानन्यायाधीश जबराको राजीनामा माग गर्दै दुई सातादेखि आन्दोलन गरिरहेको नेपाल बार एसोसिएसनले प्रधानन्यायाधीश चोलेन्द्र शमशेर जबराले तोकेका इजलासहरूमा नबस्न आग्रह गर्दै सर्वोच्च अदालतका सबै न्यायाधीशहरूलाई पत्र पठाएको छ ।
बारले विवादित प्रधानन्यायाधीशले तोकेको इजलासमा नबस्न आग्रह गर्दै पत्र पठाएको हो । सर्वोच्च अदालतका एक जना न्यायाधीशले त्यस्तो पत्र आएको पुष्टि गरेका छन् ।
नेपाल बारका अध्यक्ष चण्डेश्वर श्रेष्ठले पनि बारले सबै न्यायाधीशलाई पत्र पठाएको बताए । ‘भ्रष्ट र बिचौलियाका नाइके भनेर हामीले प्रधानन्यायाधीशको राजीनामा माग गरिरहेका छौं । बारको आन्दोलनमा गुण्डा परिचालन गरेर हतोत्साहित बनाइरहेका छन् । त्यस्ता व्यक्तिले तोकेको इजलासमा नबस्नु भनेर हामीले सबै न्यायाधीशलाई भनेका छौं,’ श्रेष्ठले भने ।
प्रधानन्यायाधीश जबराको राजीनामा माग गर्दै सर्वोच्च अदालतका न्यायाधीशहरू कात्तिक ९ गतेदेखि इजलास गएका छैनन् ।
