काठमाडौं, २३कार्तिक । भारतीय स्थल सेनाध्यक्षको औपचारिक निमन्त्रणामा प्रधानसेनापति प्रभुराम शर्मा ९ सदस्यीय सैनिक टोलीको नेतृत्व गर्दै भारतको औपचारीक भ्रमणमा नयाँ दिल्ली जानुभएको छ । भारतीय स्थल सेनाध्यक्षको मानार्थ दर्ज्यानी ग्रहण गर्न प्रधानसेनापति शर्मा सेनाको जहाजमा भारतको राजधानी नयाँदिल्ली जानुभएको हो ।
प्रधानसेनापति भएपछि शर्माको यो पहिलो विदेश भ्रमण हो। 
मंगलबार बिहान त्रिभुवन अन्तर्राष्ट्रिय विमानस्थलबाट शर्मा नयाँ दिल्ली जानुभएको नेपाली सेनाका प्रवक्ता ले जानकारी दिएको छ ।
प्रधान सेनापति शर्मालाई यही कार्तिक २४ गते भोलि बुधबार भारतीय राष्ट्रपति रामनाथ कोविन्दबाट भारतीय स्थल सेनाको मानार्थ महारथी दर्जाको दर्ज्यानी चिह्न प्रदान गर्ने कार्यक्रम छ ।
नेपाल र भारतका सेना प्रमुखहरुलाई कदरस्वरुप एकअर्को मुलुकको मानार्थ महारथीको दर्जाबाट सम्मान गर्ने प्रचलन छ। भारतीय राष्ट्रपति रामनाथ कोविन्दले राष्ट्रपति कार्यालयमा कार्तिक २४ गते हुने विशेष समारोहमा प्रधानसेनापति शर्मालाई भारतीय स्थल सेनाको मानार्थ महारथीको दर्ज्यानी चिन्हबाट सम्मान गर्नेछन्।
राष्ट्रपति विद्यादेवी भण्डारीले भारतीय सेनाध्यक्ष मनोज मुकुन्द नरवाणेलाई राष्ट्रपति कार्यालयमा आयोजित विशेष समारोहमा २०७७ कार्तिक २० गते नेपाली सेनाको मानार्थ प्रधानसेनापतिको दर्ज्यानी प्रदान गर्नुभएको थियो ।
नयाँदिल्ली पुगे लगत्तै भारतीय सैनिकको एक टुकडीले प्रधानसेनापति शर्माको सम्मानमा ‘सम्मान गारत’दिनेछ। प्रधानसेनापति शर्माले आजै भारतीय समकक्षी मनोज मुकुन्द नरवाणेसँग द्वीपक्षिय भेटवार्ता हुनेछ। प्रधानसेनापति शर्माले भारतीय आर्म फोर्सका चिफ आफ डिफेन्स स्टाफ विपिन रावतसँग समेत भेट्ने कार्यक्रम छ । भारत भ्रमणका क्रममा प्रधानसेनापति शर्माले भारतीय रक्षा सचिवसँग समेत द्धिपक्षिय हितका विषयमा छलफल गर्नुहुनेछ । औपचारिक कार्यक्रम पूरा गरी प्रधानसेनापति शर्मा कार्तिक २६ गते शुक्रबार नेपाल फर्कनुहुनेछ ।
कोरोना भाइरस संक्रमणको जोखिमका कारण यो पटक राजधानी दिल्ली बाहिर कुनै पनि कार्यक्रम तय नगरिएको नेपाली सेनाले जनाएको छ। सन् १९५० मा भारतीय सेनाका प्रथम कमाण्डर इन चिफ के एम करिप्पालाई नेपाली सेनाको मानार्थ महारथीको दर्ज्यानी दिइएको थियो। सन् १९५० देखि सुरु भएको यो प्रचलन सन् १९६९ मा एक पटक भंग भएको थियो। त्यसपछि भारतले नाकाबन्दी गरेका बेला पंचायतकालमा दुवै मुलुकका सेना प्रमुखहरुले मानार्थ महारथीको दर्ज्यानी लिएका थिएनन्।
