काठमाडौं । नेपाल कम्युनिष्ट पार्टी (एकीकृत समाजवादी)का अध्यक्ष माधवकुमार नेपालले पाँच दलीय गठबन्धनमा विवाद नभएको बताएका छन् ।
आज बानेश्वरमा पार्टीनिकट युवा संघ नेपालले आयोजना गरेको कार्यक्रममा बोल्दै अध्यक्ष नेपालले अहिले मात्र नभइ चुनावसम्म र त्यसपछि पनि गठबन्धन कायमै रहने दावी गरे ।
गठन्धनलाई स्थानीय तह सम्म पनि विस्तार गरिने नेपालको भनाई छ ।
पाँच दलीय गठबन्धनको मुख्य आधार राष्ट्रियता भएकाले निर्वाचन पछि पनि गठबन्धन यथावत रहने र साझा दस्तावेज बन्ने उनको भनाई छ ।
माओ, होचिमिन्हजस्ता नेताहरूले विश्व कम्युनिस्ट आन्दोलनलाई लोकप्रिय बनाएको उल्लेख गर्दै अध्यक्ष नेपालले त्यसबाट सिकेर अघि बढ्न पार्टीका नेता, कार्यकर्तालाई निर्देशन समेत दिए ।
अध्यक्ष नेपालले आफ्नो पार्टी सरकारमा सहभागी हुनेबित्तिकै युवाहरूलाई रोजगारी दिने काममा जोड दिने दाबी गरे ।
