काठमाडौँ भदौ २३ । प्रमुख प्रतिपक्षी दल एमालेले प्रतिनिधिसभाको बैठकमा दुई पटक अवरुद्ध गरेको छ । सभामुख अग्नी सापकोटाको भूमिका निष्पक्ष नभएको भन्दै एमालेले संसद अवरुद्ध गरेको हो ।
पहिलो बैठकमा एमालेको नाराबाजी पछि सभामुखले १५ मिनेटका लागि बैठक स्थगित गरेका थिए । उनले दोस्रो पटक बैठक बोलाएका थिए । त्यसमा पनि एमालेका सांसदले उठेर नाराबाजी गर्दै अवरोध गरेपछि सभामुखले एमाले प्रमुख सचेतक बिशाल भट्टराई र सचेतक शान्ता चौधरीसँग वार्ता गरेका थिए ।
तर सहमति नभए पछि सभामुख सापकोटाले प्रमुख प्रतिपक्षी दलको नाराबाजीकाबीच सभामुख तथा उपसभामुखको अनुपस्थितिमा बैठकका अध्यक्षता गर्नका लागि सांसदहरुको नाम मनोनयन गरेको पढेर सुनाए । जसमा चन्द्रकान्त चौधरी, मानबहादुर विश्वकर्मा, राधाकुमारी ज्ञवाली, रेणुकुमारी यादव, लालबाबु पण्डित, सत्य पहाडी, सरलाकुमारी यादव रहेका छन् ।
सभामुख सापकोटाले आफू संविधान, नियम, कानुन र ऐनअनुसार अगाडि बढ्न प्रतिबद्ध रहेको र आफूले संविधान, नियम, कानुनको बर्खिलाप केही नगरेको बैठक सञ्चालन गर्न अवरोध नगर्न आग्रह गरे पनि एमाले सांसदको नाराबाजी चलिरह्यो । अहिले फेरी केही बेरका लागि बैठक स्थगित भएको छ ।
