सुदूरपश्चिम प्रदेश सभाका १० जना नेकपा (एमाले)सांसदले नेकपा (एकीकृत समाजवादी) मा लागेको जनाउ दिँदै आज सनाखत गरेका छन् । उनीहरुले आजै प्रदेश निर्वाचन आयोगमा सनाखत गराएका छन् ।
मंगलबार दिउँसो धनगढीस्थित निर्वाचन आयोगको प्रदेश कार्यालयमा गएर उनीहरूले नयाँ पार्टीका पक्षमा सनाखत गरेका हुन्।
नयाँ पाटीतिर लाग्ने सांसदहरुमा पूर्णा जोशी, लालबहादुर खड्का, बलबहादुर सोडारी, अम्मर साउँद, चुनकुमारी चौधरी, मना साउँद, कुलवीर चौधरी, सुशीला बुढाथोकी, दुर्गा कामी र माया भट्ट छन्।
भौतिक पूर्वाधार तथा विकास मन्त्री तथा प्रदेश सभा सदस्य दीर्घ सोडारीले आफूसहित तीन जना सांसदले बुधबार आयोगमा गएर सनाखत गर्ने बताए ।
उनीसहित अर्चना गहतराज र तारा लामा तामाङले सनाखत गर्न बाँकी छ।
५२ सदस्यीय सुदूरपश्चिमको प्रदेश सभा एमालेका २५ सांसद थिए। तीमध्ये एक जना सभामुख छन् । बाँकी १८ माधव पक्षमा थिए । भीम रावल एमालेमै रहेपछि बाँकी सांसद भने उनीसँगै एमालेमै रहेका हुन् ।
