नेकपा ( एकीकृत समाजवादी ) का अध्यक्ष माधव कुमार नेपालले केपी ओलीले आफूलाई बा नभन्ने जतिलाई शत्रु र विरोधी बनाएको टिप्पणी गरेका छन् ।
चन्द्रागिरी हिल्समा पार्टीको बैठक पछि आयोजित पत्रकार सम्मेलनमा बोल्दै अध्यक्ष नेपालले केपी ओलीले पार्टीलाई निजी कम्पनीमा ढालेका कारण नै एमाले विभाजित हुन पुगेको दाबी गरे ।
राजनीतिक बैचारिुक रुपमा समेत एकलौटी गर्ने, हामीलाई निष्कासन गर्न थालेपछि बाध्य भएर नयाँ पार्टी बनाउनु परेको उनले स्पष्ट पारे ।
आफुहरुसँग पार्टीको सांसद र केन्द्रीय समितिका २० प्रतिशत बढी सदस्य रहेको भन्दै नेपालले दाबी गरे ।
एक प्रसंगमा उनले आफ्नै अनुमतिमा अष्टलक्ष्मी शाक्य मुख्यमन्त्री बनेको बताएका छन् । दल दर्ता भएको २१ दिन पछि जनप्रतिनिधिले दल छान्न पाउने भएकाले के गर्नु हुन्छ अब हेरौँ, अहिलेलाई भने उहाँ मेरो सहमतिमै मुख्यमन्त्री बन्नु भएको हो , नेपालले भने ।
उनले बिचार मिल्ने कम्युनिष्ट पार्टीहरुसँग एकताको ढोका खुल्ला राख्ने भन्दै ओली पनि सुध्रिएर बिचार व्यवहार परिवर्तन गरे एकताको ढोका खुल्ने बताए ।
