काठमाडौँ, ४ भदौ । नेकपा एमालेबाट विभाजित भएको माधवकुमार नेपाल समूहको पार्टीको नाम दर्ता नहुदैँ परिवर्तन गरिएको छ । अब नयाँ पार्टीको नाम नेकपा (एकिकृत समाजवादी) प्रस्ताव गरिएको छ । नेपाल समूहले यसअघि नेकपा (एमाले समाजवादी) प्रस्ताव गरेर दल दर्ताको निवेदन दिएको थियो ।
तर अर्को दलसंँग मिल्दो नाम राख्न नमिल्ने भएपछि राजेन्द्र पाण्डे लगायतका नेताहरू शुक्रबार निर्वाचन आयोग पुगेर नयाँ नाम नेकपा (एकिकृत समाजवादी) प्रस्ताव गरेका हुन् ।
पार्टीको नयाँ नामको निवदेन आइसकेको जानकारी दिदैँ निर्वाचन आयोगको प्रवक्ता राजकुमार श्रेष्ठले पार्टी दर्ताको प्रक्रिया पुरा भएपछि यसबारेमा आयोगले अन्तिम निर्णय गर्ने जानकारी दिए ।
गत फागुन २३ गते तत्कालीन नेकपाको नामसम्बन्धि विवादमा अदालतले मिल्दोजुल्दो नाम राख्न नमिल्ने खालको फैसला गरेको थियो । त्यसैकारण तत्कालीन एमाले र माओवादी केन्द्रको एकीकरणबाट बनेको नेकपालाई नयाँ नाम तय गर्न अदालतले भनेको थियो ।
तर नेकपाले नयाँ नाम दिएन, त्यसपछि एमाले र माओवादी केन्द्र पुरानै दलको रुपमा ब्यूँतिएका थिए । त्यसपछि बढ्दै गएको विवादका कारण एमालेको नेपाल समूहले अलग्गै पार्टी बनाउने निर्णय गरेको हो ।
