काठमाडौँ, २ भदौ । जनता समाजवादी पार्टी (जसपा)को महन्थ ठाकुर पक्षले आज निर्वाचन आयोगमा नयाँ पार्टी दर्ता गरेको छ ।
नयाँ पार्टीको अध्यक्षमा महन्त ठाकुर र नाम जसपा नेपाल (लोकतान्त्रिक) राखिएको छ । यस्तै जसपा नेपाल (लोकतान्त्रिक) को चुनाव चिह्न साइकल राखिएको छ । नेता ठाकुर, राजेन्द्र महतो, सरतसिंह भण्डारी सहित नेता तथा कार्यकर्ताहरु निर्वाचन आयोग पुगेर दल दर्ता गरेका हुन् ।
आज निर्वाचन आयोगमा जनता समाजवादी पार्टी, नेपाल (लोकतान्त्रिक) नामक राजनीतिक दलको निवेदन दर्ता भएको छ। दर्ता न.(४३४/०७८-५-२ नेता केशव झाले बताए । नयाँ पार्टीमा १२ सांसद सहित २४ सदस्यीय केन्द्रीय समिति छ ।
साथै कारागारमा रहेका रेशम चौधरी समेत यस पार्टीमा सदस्य रहेको ठाकुर पक्षका नेताहरुले बताएका छन् ।
राष्ट्रपति विद्यादेवी भण्डारीले बुधबार नेपालको संविधान धारा ११४ को उपधारा (१) बमोजिम मन्त्रिपरिषद्को सिफारिसमा अध्यादेश जारी गरेपछि एमाले र जसपा विभाजनका लागि बाटो खुलेको हो ।
गत साउन ११ मा निर्वाचन आयोगले जसपाको उपेन्द्र यादव पक्षलाई आधिकारिकता दिएपछि महन्थ ठाकुरसहितका नेताहरुले नयाँ दल दर्ताको तयारी गरेका थिए।
