सत्तारुढ नेपाली कांग्रेसका सांसद गगन थापाले दार्चुलामा भारतीय एसएसबीले नेपाली युवा सवार तुइन काटेर युवा वेपत्ता भएको घटनामा नेपालले भारतसँग दह्रोसँग लड्नु पर्ने बताएका छन् ।
संसदमा बोल्दै थापाले गत साउन १५ गते दार्चुलाको ब्यासस्थित मालघाटको महाकाली तर्ने क्रममा एसएसबीले तुइन काटिदिएर बेपत्ता भएका युवक जयसिंह धामीको पक्षमा नेपालले भारतसँग लड्न सक्छ कि सक्दैन भन्दै प्रश्न गरे ।
उनले दार्चुलाको मालघाट घटनालाई सन् २०१२ मा भारतको केरलमा भएको घटनासँग तुलना गरे।
आफ्ना दुई मछुवारलाई हत्या गरिदिएको विरोधमा इटलीसँग भारतले लगातार लडेको प्रसङ्ग उठाउँदै थापाले नेपाल सरकारले पनि अहिले जयसिंह धामीको केसमा त्यसैगरी लड्नुपर्ने बताए ।
सन् २०१२ मा केरलाको सामुद्रिक तटनजिक इटलीका सैनिकले दुईजना भारतीय मछुवारको हत्या गरिदिएपछि भारतीय सरकार चार वर्षसम्म लगातार लडेको थियो।
जयसिंह धामीको विषयमा सत्यतथ्य आइसकेपछि, उनको अवस्था पत्ता लागेपछि सरकारले जसरी भारत इटलीसँग लड्यो, त्यसैगरी नेपाल सरकार पनि भारतसँग डटेर लड्नुपर्नेमा उनले जोड दिए ।
