माओवादी केन्द्रमा केही सांसद एमाले प्रवेश गरेपछि अब ४९ जना सांसद छन् । ती सबै जसोले मन्त्री खान पाउनु पर्छ भन्न थालेपछि अध्यक्ष प्रचण्डले आफू तनावमा परेको सार्वजनिक अभिव्यक्ति नै दिए ।
माओवादीले यस अघि नै जनार्दन शर्मा र पम्फा भुषाललाई अर्थ र उर्जामन्त्री बनाईसकेको छ ।
बाँकी ४७ जना सांसद मध्य पनि धेरै जसोले मन्त्री हुन पार्टी नेतृत्वलाई चाहना व्यक्त गरीरहेकाले पनि नेतृत्व दबाबमा छ । हुन पनि माओवादीमा केही नेताले पटक पटक मन्त्री भएर काम गरीसकेका छन् र तीनै नेताहरु पुनः जान खोजिरहेका छन् ।
अर्कोतिर पटक पटक सांसद भएका तर मन्त्री हुन नपाएकाहरुले पनि हाम्रो पालो कहिले आउने भन्दै नेतृत्वलाई दबाब दिईरहेकाले माओवादी केन्द्रलाई नाम छान्न धौ धौ परिरहेको छ ।
माओवादीले लगभग ७ वटा मन्त्रालय पाउनेछ । अब मन्त्री र केही राज्य मन्त्री बनाउदा पनि ५ देखि ७ जना सम्म मन्त्री छान्न बाँकी छ ।
तीनै नाम टुंगो लगाउन माओवादी केन्द्रले आज तीन बजे स्थायी समितिको बैठक बोलाएको छ । बैठकमा अब प्राथमिकता र क्षेत्र हेरेर निर्णय हुन सक्ने एक नेताले जानकारी दिए ।
देउवा सरकार गठन भएको तीन साता वित्दा पनि मन्त्रीमण्डल अझै विस्तार हुन सकेको छैन ।
यसको कारण माधव नेपाल समुह सरकारमा जाने नजाने निश्चित नहुनु, माओवादी र जसपाले आन्तरीक रुपमा मन्त्रीहरुको नाम चयन गर्न नसक्नु रहेको देखिएको छ ।
