नेकपा एमाले केन्द्रीय समितिको बैठक आज पनि बस्दै छ । आज बस्ने बैठकमा देउवाको पक्षमा विस्वासको मत दिने २२ सांसदलाई सोधिएको स्पष्टीकरण र कार्बाहीको विषयमा छलफल हुने एक केन्द्रीय सदस्यले जानकारी दिए ।
देउवाको पक्षमा भोट हाल्ने एमाले हुन नसक्ने भन्दै विपक्षमा मत हाल्न निर्देशन दिए पनि माधव नेपाल सहित २२ सांसदले देउवालाई विस्वासको मत दिएका थिए ।
त्यस लगत्तै कडा कार्बाही गर्ने ओलीको चाहना भए पनि अन्य नेताहरुले पार्टी एकता बचाउन भन्दै लचकता अपनाउन सुझाएका थिए ।
सोही आधारमा २२ सांसदलाई ५ गतेको मिति राखेर ६ गते विस्वासको मत दिएको बिषय उल्लेख नगरी किन विपक्षी गठबन्धनमा सामेल भई अपराधपूर्ण कार्य गरेको भन्दै साधारण सदस्य समेत नरहने गरी कार्बाही किन नगर्ने ? कार्बाही गर्नु पर्ने नभए स्पष्टीकरण बुझाउन भनेको थियो ।
संभवत २२ सांसदले स्पष्टीकरण बुझाउने संभावना कम छ । सोही कारण पनि आजको केन्द्रीय समितिको बैठकले उनीहरुमाथि गर्ने कार्बाहीबारे निर्णय हुन सक्ने अनुमान गरिएको छ ।
