साउन ३, काठमाडौँ । प्रधानमन्त्री शेरबहादुर देउवाले जनता समाजवादी पार्टीका अध्यक्ष महन्थ ठाकुरसँग विश्वासको मत मागेका छन् ।
देउवाले आज पत्र पठाएर प्रतिनिधिसभामा विश्वासको मत लिने कार्यक्रम रहेको जनाउँदै उक्त प्रस्तावमा मत दिन ठाकुर र उनका पक्षका सांसदहरुलाई अनुरोध गरेका हुन् ।
२०७८÷४÷३ गते बस्ने प्रतिनिधिसभाको बैठकमा विश्वासको मत लिने कार्यक्रम रहेकोले उक्त प्रस्तावमा यहाँ र यहाँ सम्बद्ध माननीय सदस्यहरुको तर्फबाट समर्थन गर्न गराइदिनु हुन हार्दिक अनुरोध गर्दछुु देउवाले लेखेको पत्रमा उल्लेख छ ।
प्रतिनिधिसभाको आज बस्ने दोस्रो बैठकमा प्रधानमन्त्री देउवाले विश्वासको मत लिँदै छन् । जसपा उपेन्द्र यादव बाबुराम भट्टराई पक्षले भने देउवालाई प्रधानमन्त्रीमा विश्वासको मत दिने निर्णय गरिसकेको छ । ३२ सांसद रहेको जसपाको यादव भट्टराई पक्षमा १९ जना सांसद देखिएका छन् । ठाकुर पक्षमा १३ जना सांसद छन् ।
देउवालाई कांग्रेसबाहेक नेकपा (माओवादी केन्द्र), नेकपा (एमाले) वरिष्ठ नेता माधवकुमार नेपाल समूह, जनमोर्चाले समर्थन जनाएका छन् ।
