नेकपा एमालेले प्रधानमन्त्री शेर बहादुर देउवाले विस्वासको मत आजै लिनुमा एमाले फुटाउने उदेश्य रहेको निष्कर्ष निकालेको छ । एमालेको आज बसेको स्थायी समितिको बैठकले उक्त निष्कर्ष निकाल्दै वरिष्ठ नेता माधव कुमार नेपाल बेग्लै कोर्षबाट अघि बढ्न खोजेको पनि ठहर गरेको छ ।
तुलसीलाल अमात्य प्रतिष्ठानमा बसेको स्थायी समितिको बैठकमा माधव नेपालले एक्लै भए पनि देउवाको पक्षमा मत दिने भनेको कुरालाई ब्रिफिङ भए सँगै माधव नेपाल बेग्लै कोर्षमा हिँड्न खोजेको ठहर गरिएको हो ।
यसैबीच, एमालेले भने प्रधानमन्त्री देउवालाई विस्वासको मत नदिने निर्णयलाई पुनः दोहोर्याएको नेता प्रदीप ज्ञवालीले जानकारी दिए ।
यसै गरी एमाले स्थायी समितिको बैठकले प्रधानमन्त्री शेर बहादुर देउवाको पक्षमा मत दिनेहरुलाई एमालेमा नराख्ने निर्णय गरेको छ ।
आइतबार अध्यक्ष केपी ओलीको अध्यक्षतामा बसेको स्थायी कमिटी बैठकले देउवालाई पार्टीले समर्थन गर्न नसक्ने र समर्थन गर्ने पार्टीका नेताहरु एमाले नहुने निर्णय गरेको हो ।
बैठकपछि प्रवक्ता प्रदीप ज्ञवालीले पुनःस्थापित संसदको पहिलो बैठकमै विश्वासको मत लिने प्रधानमन्त्री देउवाको प्रस्तावले धेरै प्रश्न जन्माएको भन्दै देउवालाई विश्वासको मत दिने नेताहरु नेकपा एमालेमा नरहने निर्णय गरिएको जानकारी दिए ।
